Italia rrezikon të përballet me sanksione të paprecedenta nga Bashkimi Europian, pasi qeveria shkeli rregullat e buxhetit në vitin 2018. Në raportin më të fundit të Komisionit Europian konstatohet se vitin e kaluar niveli i borxhit publik u rrit me 1% duke prekur nivelin 132% të Prodhimit të Brendshëm Bruto.
Qeveria italiane shkeli rregullat buxhetore të unionit që parashikojnë që borxhi publik duhet të qëndrojë nën 60% të Prodhimit të Brendshëm Bruto. Rregullat u përcaktuan pas krizës së vitit 2010 dhe synonin reduktimin e deficitit buxhetor.
Valdis Dombrovskis, Zv/President i KE: Në nuk i hapim që sot procedurat për deficitin e tepruar. Por më tepër se këto procedura, ne shohim dëmin që po i shkaktohet ekonomisë italiane me politikat më të fundit që ata po ndërmarrin.
Raporti i KE-së vlerëson se politikat e ndërmarra nga qeveria populiste italiane kanë çuar ekonominë në stanjacion dhe kanë rritur borxhin. Megjithatë, kryeministri Konte thotë se rregullat e masat ekonomike të unionit janë jo-koherente e tepër të ashpra dhe e kanë penguar zhvillimin ekonomik të Italisë që pas krizës. Zv/kryeministri italian, Mateo Salvini, i përfshirë muajt e fundit në polemika me KE-në kërkoi lehtësimin e tyre. Italia është ekonomia e katërt e Eurozonës dhe zhytja e saj në një krizë si ajo e Greqisë rrezikon të përfshijë gjithë hapësirën e përbashkët monetare europiane në katastrofë ekonomike.
