Zgjedhjet e njëanshme do të ishin një precedent i rrezikshëm për vendin. Kështu iu përgjigjën pyetjes së gazetarit Çim Peka, dy analistët, Blendi Fevziu dhe Sokol Balla.
Por ndërsa ndajnë të njëjtin mendim për faktin se zgjedhjet monopartiake janë të rrezikshme, analistët ndajnë qëndrime të ndryshme për mënyrën sesi po sillen dy forcat më të mëdha politike në vend.
“Realiteti, sot është që kemi një kryetar opozite që të shtunën thotë do ta marrë në dorë sovrani dhe një kryeministër që thotë se zgjedhje do të ketë dhe ata që kundërshtojnë do të dalin para drejtësisë. 30 qershori nuk ka vlerë sepse nuk ka konkurent por nuk mund të shtyhen se nuk ka marrëveshje” tha Balla në emisionin e Çim Pekës.
Për nënshkrimin e një marrëveshje është edhe Blendi Fevziu. Sipas Fevziut edhe presidenti mund të ndërhyjë dhe ‘ti japë një zgjidhje duke spostuar zgjedhjet. Fevziu hedh disa ide për datën e zgjedhjeve. Sipas tij një version është tërheqja e Partisë Socialiste nga zgjedhjet.
“Më e dëmshmja është të ketë një përplasje në 30 qershor.
Çdo zgjidhje që ul opozitën dhe qetëson situatën është e pranueshme.
Çdo zgjidhje që çon qytetarët të veshin rrobën e ushtarakut është e rrezikshme
As ikja e Ramës dhe Bashës nuk është problem”-tha balla
Ndërkohë për Fevziun çdo minutë që kalon është fatale për vendin.
