Këshilli i Rezistencës së Iranit (NCRI), të njohur ndryshe si muxhahedinët iranianë, kanë paralajmëruar se regjimi në Teheren po përgatitet të sjellë në Shqipëri një grup të mirëorganizuar spiunësh kundër muxhahedinëve që strehohen në vendin tonë.
Sipas NCRI, Garda Revolucionare e Iranit do të dërgojë në Tiranë grupin e spiunëve, të cilët do të shtiren si investues dhe gazetarë. Qëllimi i tyre është të godasin muxhahedinët në Shqipëri, thuhet në reagimin e NCRI.
Kreu i këtij delegacioni është Gholam Hossein Kazemi, vijon njoftimi, i cili është veteran i trupave të Gardës Revolucionare dhe drejtor i një kompanie të madhe kontraktuese të quajtur “Asia-Kar Bakhtar”. Drejtori ekzekutiv i kësaj kompanie është Saeed Kazemi, i biri i Gholam hossein Kazemi, dhe ajo ka patur aktivitete edhe në Siri.
Në emër të kësaj kompanie, Ministria e Inteligjencës e Iranit ka për qëllim të marrë viza dhe leje qëndrimi për spiunët, të cilët do vijnë në Shqipëri me pretendimin për të investuar në ndërtime vilash dhe apartamentesh.
Disa muaj më parë, Qeveria shqiptare dëboi nga vendi ambasadorin e Iranit, Gollamhossein Mohammadnia dhe zyrtarin Mostafa Roudaki, pasi akuzoheshin se ishin përfshirë në aktivitete jashtë kuadrit diplomatik.
Teherani reagoi ashpër duke e quajtur Shqipërinë një ‘vend të dobët dhe të varfër’ që përdoret kundër Republikës Islamike nga SHBA, Izraeli dhe Arabia Saudite.
