Vijojnë lëkundjet e tërmetit në zonën e Korçës, duke shkaktuar panik te qytetarët.
Një tjetër goditje e fortë ka alarmuar banorët në juglindje të vendit, ndërsa lëkundjet janë ndjerë edhe në Tiranë, kryesisht në katet e larta të pallateve.
Sipas regjistrimeve, lëkundja ka intensitet 4.8, dhe ndodhet në afërsi të Bilishtit.
Lëkundja të tjera janë regjistruar më herët në orën 04.26, 04.31 dhe 04.52 të mëngjesit.
Sipas prefektit të Korçës, Dhori Spirollari, lëkundjet deri më tani kanë shkaktuar dëme të vogla në banesa në fshatin Dvoran, Floq dhe Vidohovë, kryesisht plasaritje të mureve dhe në disa raste edhe shembje të tavaneve.
Nga raportimet zyrtare mësohet se 60 banesa janë dëmtuar, ndërsa 4 persona kanë mbetur të dëmtuar dhe kanë kërkuar ndihmë mjekësore. Ndërkohë nga Emergjencat Civile janë shpërndarë 50 çadra në ndihmë të banorëve.
Banorët nuk pranojnë të futen në banesa, për shka të frikës së një tërmeti të radhës.
Ata i kanë bërë apel gjithashtu strukturave bashkiake që të nisin menjëherë ngritjen e çadrave dhe dërgimin e ushqimeve, pasi disa prej banesave janë jashtë funksionit.
“Isha shtrirë dhe në momentin që doja të ngrihesha, pata një aritmi të tmerrshme. Ime shoqe u trondit shumë. Menjëherë mora në telefon vajzën, që jeton në kat të gjashtë dhe ajo ishte shumë e trembut. E dyta më tmerroi fare. Nuk kthehemi në shtëpi sepse mund të përsëritet sërish. Unë dola në tërmetin e tretë”, tha një nga banorët.
“Shumë frikë. Isha në punë, na ranë xhamat dhe u larguam. Jemi të tmerruar. Që nga viti 1994-1995 nuk kemi parë një tërmet të tillë”, tha një tjetër.
“Frika është e madhe. Ishte shumë e fortë. Ku të rrish? Kush e di se nga do të fluturojmë. Isha vetëm në shtëpi”, tha një e moshuar.
