Kryeministri Edi Rama ka vijuar me mbrojtjen ndaj kryebashkiakut në detyrë të Durrësit, Vangjush Dako, i kapur në përgjime me persona të inkriminuar, e njohur ndryshe si dosja “339”.
Rama tha se prokuroria po e heton çështjen, Dako ka shkuar në prokurori, ndërsa shtoi se s’ka kuptim të vihet në diskutim rezultati i PS-së në Durrës vetëm për një “alo Niçe”.
“Kemi fituar në Durrës edhe në 2009. Dako është bërë kryebashkiak në 2007, në 2011, kemi fituar në 2013, kur në qeveri ka qenë Sali Berisha. Atëherë çfarë dmth kjo, që Berisha, i ndjeri Olldashi, Topalli e Bode ishin më të dobët se Basha, Noka e Ndoka?
Nuk ka pasur shit-blerje votash, është e pamundur që të ndryshohet rezultati i zgjedhjeje dhe po ju them se as PS dhe as PD nuk blejnë votat. Vetë Basha e ka thënë në 2017-ën, merrini lekët SHPK-së, dmth LSI-së, dhe hajdeni në shtëpi”, tha Rama.
Sipas tij, “alo Niçe” mund të jetë një ushqim për qentë, por jo për të mbajtur peng një vend.
