Elisa Spiropali, ministre e Shtetit, tha se kjo është një fazë papjekurie që shpejt do e kalojmë. Spiropali në emisionin “A Shoë” tha se fakti që është nga Ballkani, e bën që të shpërthejë dhe i ndizet gjaku.
E pyetur se sa bashki do të fitojë PS në 30 qershor, Spiropali tha se nuk na duhet fare numri, nuk ka asnjë rëndësi, por shanset janë të larta që t’i fitojmë të 61 bashkitë, pasi PD dhe LSI u tërhoqën nga beteja.
“Opozita me djegien e mandateve dhe mosmarrjen pjesë në zgjedhje i ka bërë një puç Shqipërisë. Ne nuk shqetësohemi për PD, por për mejdanin politik, për frymën politike në vend”, tha ajo.
E pyetur sepse nuk ulet PS për zgjidhjen e krizës, Spiropali tha se ne jo vetëm jemi ulur, por jemi përulur gjithmonë.
“Nuk po pretendoj se në partinë time s’ka pleh brenda, as po pretendoj se në njërën anë ka ujë të kulluar, por ne as mund t’i nxisim dhe as t’i ndalojmë opozitarët të hidhen në lumë”, tha Spiropali.
“Nuk kam asnjë problem me protestat, i heq kapelat, por jam kundër molotovëve, sikundër ndodhi në dy protesta përpara dhe ato pamje bënë xhiron e botës. Ndërsa në protestën e fundit u tërhoqën se pati një ndërhyrje të jashtëzakonshme”, tha Spiropali.
E pyetur se kush e ka dëmtuar më shumë imazhin e Shqipërisë molotovi në protesta apo kanabizimi i vendit, Spiropali tha se ajo që është thënë për kanabisin nuk është e vërtetë.
“Nuk mbeti fushë dhe zabel pa u mbjellë me kanabis”, tha drejtuesi i emisionit Adi Krasta, por kjo u mohua nga Spiropali, sipas të cilës kjo nuk është aspak e vërtetë.
Spiropali tha se në këtë vend janë mbyllur vrasje me një telefonatë. Por Krasta i tha se besoj se je në dijeni të telefonatave të tmerrshme të kryeministrit me gjykatësit, gjë që u mohua nga Spiropali.
“Ne nuk kemi si synim të fusim njeri në burg, ne duam të reformojmë sistemin e drejtësisë”, tha Spiropali, ndërsa drejtuesi i emisionit duke e ndërprerë i tha “po s’ju takon juve të reformoni sistemin e drejtësisë”.
