Nga Boldnews.al
Kur sot vendi është në zgrip të konfliktit politik dhe civil, Parlamenti ynë diskuton për Luftën e Dytë Botërore. Kush ishin më trima dhe atdhetarë, djemtë partizanë me në krye Enver Hoxhën, apo balllistët që hanin pula e pinin raki?
Hall i madh për vendin tonë. Por ka burra ai Parlament, duke gjetur mes tyre “partizanë” dhe “ballistë”, që u përleshën gojarisht për idealet që nuk do i shkelin kurrë.
“Neofashistët e tipit Tufa e Çela, (Agron Tufa dhe Çelo Hoxha), kërkojnë të glorifikimin bashkëpunëtorët e fashizmit dhe nazizmit…-Po ju them se e keni kthyer institutin në celulë të Ballit Kombëtar, jo vetëm se jeni mbledhur aty me kokrra, po luani me zjarrin duke shkelur ligjin dhe shpërdoruar luftën antifashiste nacional çlirimtare, të cilën nuk e bëtë ju dhe soji juaj, as Milodin Popviçi dhe Dushan Mugosha siç shpreheni vetë. Luftën e bënë bijtë e këtij vendi, edhe ata ballistë që pas 24 majit u rreshtuan tek partizanët, si dhe koalicioni antifashist, sovjeto anglo-amerikan”-tha ndër të tjera deputeti socialist, ish-LSI-st, e akoma më shumë ish-gjyqtar i kohës së diktaturës, Spartak Braho.
Këtë “fyerje” për Ballin Kombëtar nuk mund ta duronte deputeti rishtar, që e quan veten opozitar Adriatik Alimadhi, i cili është edhe kryetar i Ballit Kombëtar Demokrat.
“Këtu ka njerëz të zgjuar, historianë, po të biem kaq poshtë në nivelin e këtij budallai këtu, që nuk di asgjë për historinë këtu. Më ndëshkoni sipas rregullores, por kam një gjë. Kur ky thotë që ballistët hanin pula, po cfarë po thoni, po ju keni ngrënë koka njerëzish, nuk dini historinë, keni vrarë 4-6 mijë shqiptarë, kriminelët partizanë, kriminelët komunistë, ju nuk dini asgjë, ju qëllimisht nuk e lejoni historinë”- tha ai, duke shtuar “Nëse me jepni një dokument që Balli ka vrarë një komunist apo partizan jap dorëheqjen”.
Edhe ky “idealist” e dinte mirë cili ishte ai Parlament, por priti me padurim deri sa ti vinte radha për të futur emrin në listën e deputetëve, që më pas të vetëshpallej opozitar, sigurisht me izmin e kryeministrit Edi Rama, që tashmë opozitën po e emëron.
Është gati të japë dorëheqjen nëse zbulohet se një ballist ka vrarë një partizan në kohën e luftës, por as ka ndërmend të japë dorëheqje kur qytetarët që nuk duan kryeministrin Edi Rama sulmohen e burgosen. As kur e kupton se qëndrimi i tij aty legjitimon në aparencë një parlament njëpartiak, Parlamentin e Rilindjes.
Nuk janë të vetmit, “ballisti” Alimadhi dhe “partizan” Braho konsiderohen gati si elita e atij grupi burrash e grash, pasi ka të tjerë deputetë që rishtarë që “shkrimi” më i gjatë që kanë bërë në jetën e tyre, është plotësimi i formularit në KQZ për tu bërë më pas deputetë.
