Dy ditë para protestës së 25 majit dhe pas refuzimit që Lulzim Basha i bëri letrës së hapur të Edi Ramës që e ftonte në një dialog pa kushte, ambasadorët e vendeve të BE në Tiranë kanë thërritur në një takim kreun e PD.
Sipas A2CNN, takimi do të zhvillohet në selinë e Delegacionit të BE-së në Tiranë.
Takimi i Bashës me ambasadorët vjen në një kohë kur nga opozita është deklaruar përshkallëzimi i protestave, ndërsa KQZ sot refuzoi të drejtën e PD dhe LSI për të pasur përfaqësuesit e saj në Komisionet Zgjedhore për zgjedhjet lokale të 30 qershorit.
Diplomatët e akredituar në Tiranë kanë qenë konfuzë në qëndrimet dhe reagimet e tyre lidhur me situatën politike në vend, kur prej 16 marsit, opozita dhe mbështetësit e saj, protestojnë duke kërkuar largimin e Ramës nga posti i kryeministrit dhe krijimin e një qeveria tranzitore që do të përgatiste zgjedhjet e parakohshme.
Opozita ka djegur mandatet e deputetëve, duke ndërmarrë një veprim të konsideruar si ekstrem, ndërsa nuk është regjistruar për zgjedhjet lokale të 30 qershorit, duke deklaruar se nuk do të ketë zgjedhje në këtë datë.
