Në 1 gusht 1976, Niki Lauda pëson një aksident të rëndë në Çmimin e Madh të Gjermanisë.
Piloti austriak, i cili ndërroi jetë dje në moshën 70-vjeçare, humbi kontrollin e Ferrarit të tij në xhiron e dytë të garës, pasi pista e vjetër e Nurburgringut nuk ishte tharë ende nga shiu i rënë gjatë gjithë paradites. Pasi përplaset dhunshëm me barrierat e pistës, Ferrari merr flakë. Lauda pësoi djegie të gradës së parë dhe të tretë në kokë, fytyrë dhe duar. Gjithashtu, mushkëritë iu dëmtuan nga thithja e gazrave të dëmshme.
Niki Lauda kishte humbur helmetën, mbrojtësja e fytyrës nuk ishte aq e fortë sa sot- djegiet e fytyrës më vonë u kthyen në shenjën dalluese të tij. Arturo Merzario, Guy Edwards, Brett Lunger dhe Harald Ertl ishin pilotët që dolën nga makinat e tyre dhe ndihmuan austriakun që të largohej nga njëvendëshja në flakë, duke i shpëtuar jetën.
Forca e pilotit habiti atëherë botën: 42 ditë më vonë Niki Lauda ulet sërish në sediljen e Ferrarit. Në Monza ai përfundoi në vendin e katërt dhe me fashot e fytyrës të mbuluara nga gjaku. edhe pas aksidentit, ai bëhet sërish kampion bote.
Niki Lauda iu transplantua vitin e kaluar një mushkëri e re, pas kësaj rehabilitimi ishte shumë i vështirë. Ai lë pas gruan dhe 5 fëmijë.
