Qeveria nuk po punon, e ka mendjen sa policë do verë te gardhi. Kështu u shpreh ndër të tjera, Luan Bregasi, këshillta i PS-së në Bashkinë e Tiranës, njëherazi edhe kreu i Biznes Albania.
Bregasi ka reaguar lidhur me situatën politike në vend gjatë një mbledhjeje të Forumit të Dhomave të Tregtisë dhe Shoqatave të Sipërmarrjes.
Përmes një deklarate ata i kanë drejtuar një apel klasës politike që të ulet urgjent në gjetjen e zgjidhjeve sa më parë, për të kaluar ngërcin politik.
Sipas Bregasit, situata politike në të cilën po kalon Shqipëria, ka ndikim të drejtpërdrejtë në ekonominë dhe bizneset e vendit.
“Situata sa vjen e po agravohet. Shqipëria ka patur kriza të ngjashme, ndonjëherë edhe jemi mbledhur me porosi, por ky është i pari rast që mblidhemi me vullnet të brendshëm, për të stabilizuar sado pak vendin.
Duhet t’i thërresin mendjes sepse kanë përgjegjësi të mëdha. Duhet urgjentisht të ulen. Ne nuk japim as receta, as rekomandime por në tagrin tonë si sipërmarrës e kemi morale të them, uluni thirrini mendjes dhe gjeni zgjidhjet më të mira. Ne nuk duam të shikojmë dhunë, përplasje, zjarre. Jo nuk duam ne, por nuk janë në interes të vendit.
As qeveria nuk po punon sepse mendojnë sa policë do vënë tek gardhi. Kjo situatë e thënë kështu, pa ngarkesë pavarësisht se jemi të ngarkuar por jo ngarkesa politike, palët duhet të ulen, të dialogojnë.
Iu rekomandojmë palëve më shumë përgjegjësi për vendin, për ekonominë. Ne nuk ikim nga Shqipëria.
Nëse një politikan dështon e ka zgjidhjen, kurse ne sipërmarrësit ku do vemi, kemi kontrata, kredi në banka”, u shpreh Bregasi.
