Plagosi me thikë nënën e tij dhe kamarierin e një lokali, arrestohet nga policia. 26-vjeçari, G.M është arrestuar pas plagosjes së nënës dhe një tjetër personi, ndërsa ka shfaqur probleme psikologjike.
I sapokthyer nga Italia, ku ishte si emigrant, 26-vjeçari ka shfaqur probleme.
Fillimisht, 26-vjeçari G.M. ka goditur me thikë një kamerier në zonën e Lungomares, në momentet kur ka shkuar për të konsumuar një kafe në lokal. Pas kësaj ngjarjeje mësohet se 26-vjeçari është larguar me shpejtësi nga vendi i ngjarjes drejt banesës së tij, ku pas një konflikti, menjëherë pas mbërritjes në shtëpi, ka goditur dhe nënën e tij po me thikë.
Në momentet e gjendjes së rënduar, 26-vjeçari ka tentuar të godasë edhe babain e tij, i cili ka arritur të shpëtojë duke u fshehur në shtëpi. Pas kësaj, i riu është larguar me shpejtësi nga vendi i ngjarjes. Disa metra larg banesës së tij, 26-vjeçari është kapur nga forcat e Policisë. Mësohet se në momentet e arrestimit, gjendja psikologjike e tij ishte mjaft e rënduar.
Nga ana tjetër, gjendja e personave të plagosur mësohet se mbetet jashtë rrezikut për jetën, ndërsa 26-vjeçari akuzohet tashmë për veprat penale “Plagosje e lehtë me dashje” dhe “Dhunë në familje”.
“Policia ka arrestuar në flagrancë shtetasin G.M., 26 vjeç, banues në Vlorë. Specialistët për Hetimin e Krimit pranë Komisariatit të Policisë Vlorë, pas konsultimit me Prokurorin, kanë bërë arrestimin e tij, pasi ky shtetas ka plagosur me thikë nënën e tij dhe një shtetas tjetër për shkak të gjendjes së rënduar psikologjike”, bën të ditur zyrtarisht Policia.
