Ministri i Brendshëm, Sandër Lleshaj, ka zbardhur skenarin me të cilin policia do të reagojë në rastet e protestave.
Duke folur me kode, Lleshaj tha se do të përdoret strategjia 1 1 0, që sipas tij do të thotë që policia do të veprojë me një shkallë më poshtë në nivelin e dhunës, por do të ketë 0 viktima.
Kjo do të thotë se Lleshaj nuk do të heqë dorë nga përdorimi i gazit, që në të gjitha protestat e opozitës është përdorur me shumicë kundër protestuesve.
“Po ju them që policia ka këtë qasje dhe detyra e dhënë nga ministri, që është shndërruar në strategji është “1 1 0”: një moment më mbrapa në kohë, pra Policia do të reagojë gjithmonë një hap më mbrapa; një shkallë më poshtë në nivelin e dhunës dhe 0 viktima, kjo është qasja e Policisë; pra gjithmonë më pak sesa ajo që është përballë, nëse dikush ngre dorën kundër Policisë sigurisht Policia do të përgjigjet, sepse duhet të përgjigjet, por gjithmonë reagimi i Policisë do të jetë proporcional dhe gjithmonë më poshtë sesa reagimi i atyre që ngrenë dorën ose tentojnë të ballafaqohen me Policinë e Shtetit”, tha Lleshaj.
Lidhur me zgjedhjet e 30 qershorit, Lleshaj tha se “askush nuk mund t’i ndalojë zgjedhjet, zgjedhjet janë të qytetarëve shqiptarë. Sigurisht që nëse do të ketë njerëz që do të dalin nga kufijtë e arsyes dhe të ligjit, patjetër që organet përkatëse të sigurisë dhe të ligjzbatimit do të marrin masat e duhura. Plane ka për gjithçka”.
Sandër Lleshaj është i vetmi gjeneral që ka pranuar të heqë dorë nga gradat dhe të marrë një pozicion ministri të Brendshëm në 28 vitet e fundit. Duket se eksperienca si ushtarak i ka shërbyer Lleshajt për të ndërtuar strategji kundër protestave që bazohen në përdorimin me shumicë të gazit kundër qytetarëve, duke kontaminuar hapësira të tëra në kryeqytet për disa orë, përfshi këtu edhe banesat që ndodhen pranë zonave ku hidhet gaz.
