Tashmë, të gjithë në kampin bardhekuq janë duke bërë llogaritë. Me laps dhe letër në dorë, korçarët shohin shanset e tyre në lidhje me objektivin që u është vendosur nga klubi. Humbja me Teutën dhe eliminimi nga Kupa ishin ngjarjet më të rënda për zhvillimet e objektivit.
Me një këmbë jashtë Europës, korçarët tashmë kanë shpresat me minimale. Tri ndeshjet e radhës kërkojnë pikët maksimale në Korçë. Duke hequr ndeshjen e fundit që është e fituar në tavolinë përballë Kamzës, bardhekuqtë duhet të nisin me një fitore ndaj Kukësit. Dhe më pas është ndeshja ndaj Luftëtarit në Korçë që mund të jetë pa pretendime në lidhje me objektivat sezonalë.
Të dyja këto sfida duhen fituar dhe nga ana tjetër duhet të shpresojnë në një frenim të mundshëm të Laçit në ndeshjet e veta. Edhe nëse ndodh kjo, bardhekuqtë duhet të shpresojnë te diçka tjetër. Kupën e Shqipërisë duhet ta fitojë Kukësi, me qëllim që të lirojë vendin e katërt në kampionat.
Vend, i cili nëse Kukësi shpallet fitues i Kupës, atëherë ekipi i renditur në këtë pozicion fiton të drejtën për pjesëmarrje në Europë. Gjithsesi, para këtyre skenarëve, korçarët duhet të marrin lajmin pozitiv nga KAS. Lajm që është në pritje dhe nuk dihet sesi do të përfundojë.
