Kreu i Partisë Demokratike Lulzim Basha rreth orës 10:00 ka nisur një takime me ambasadorin e Britanisë së Madhe në Tiranë, Dunkan Norman.
Takimi vjen në një kohë kur opozita ka intensifikuar aksionin e saj kundër qeverisë.
Opozita kërkon largimin e Edi Ramës nga posti i kryeministrit dhe krijimin e një qeverie tranzitore, ndërsa ka paralajmëruar se në 30 qershor nuk do të ketë proces zgjedhor.
Në anën tjetër, ambasadori britanik, ka thënë se zgjedhjet duhet të jenë demokratike, por që të jenë të tilla, duhet që të gjitha palët të marrin pjesë.
“Zgjidhja për krizën politikë është në fakt që të dyja palët të bisedojnë me njëra-tjetrën dhe çdo zgjidhje patjetër që mund të vijë vetëm përmes dialogut.
Sa i përket zgjedhjeve me 30 qershor mendoj që teknikisht mund të realizohen në datën e caktuar por është e rëndësishme që të jenë demokratike dhe kjo do të thotë se të gjitha palët të marrin pjesë në zgjedhje”, ka deklaruar pak ditë më parë Norman.
Nuk dihet nëse diplomati britanik është angazhuar në një proces negociues mes qeverisë dhe opozitës, por takimi vjen 3 ditë para se Lulzim Basha të udhëtojë drejt Londrës me ftesë të partisë Konservatore dhe Parlamentit britanik.
