Opozita ka thirrur një tjetër protestë pasditen e sotme, si kundërpërgjigje ndaj dhunës që Policia e Shtetit ushtroi ndaj qytetarëve në tubimin e organizuar të shtunën.
Pritet që disa mijëra qytetarë t’i bashkohen kësaj proteste, e cila pritet të jetë me një tjetër format, nga ato që janë zhvilluar deri më tani.
Madje, ajo që bie në sy në dallim nga herët e tjera, është fakti se në letrën e informimit që PD i ka drejtuar policisë lidhur me zhvillimin e protestës, ajo u kërkon punonjësve të ndershëm që të mos bëhen pjesë e provokimeve dhe dhunës së paligjshme ndaj qytetarëve.
Gazmend Bardhi, Sekretar i Përgjithshëm i PD-së, thekson se Policia e Shtetit, në mënyrë të përsëritur, ka kryer akte dhune ndaj qytetarëve në mënyre kriminale dhe me urdhër politik, për te cilat PD ka kryer kallëzim penal.
Pak kohë më parë, PD depozitoi në prokurori një kallzim penal ndaj ministrit të Brendshëm, Sandër Lleshaj, por që duket se ka mbetur në sirtarët e organit të akuzës.
