PËRDITËSUAR/ Lirohet nga qelia deputeti i PSD-së në Kosovë Dardan Molliqaj, i cili është edhe bashkëshorti i ministres Besa Shahini. Molliqaj u arrestua më herët gjatë ditës së sotme, për pjesëmarrje në protestën për lirimin e deputetit Albin Kurti, në vitin 2015, njoftoi PSD.
***
Arrestohet bashkëshorti i ministres së Ramës
Policia e Kosovës arrestoi në orët e para të mëngjesit të sotëm deputetin e Kosovës, Dardan Molliqaj, i cili është edhe bashkëshorti i ministres Besa Shahini.
Lajmin për arrestimin e Molliqajt e ka bërë të ditur, subjekti i tij politik PSD me anë të një njoftimi në rrjetet sociale.
Sipas PSD-së, Molliqaj ‘është arrestuar në banesën e tij dhe nuk ka qenë i paralajmëruar më herët për seancë apo paraqitje ne gjykatë.
“Molliqaj është arrestuar nën arsyetimin për pjesëmarrje në protestën për lirimin e deputetit Albin Kurti, në vitin 2015.
Arrestimi i deputetit në fjalë ka qenë në kundërshtim me liritë dhe të drejtat e njeriut dhe në shkelje të plotë të procedurave ligjore. Për këtë arsye, ajo protestë ka qenë e drejtë dhe e nevojshme.
Partia Socialdemokrate kërkon lirimin e menjëhershëm të deputetit Dardan Molliqaj. PSD është për shtet të së drejtës, ku respektohet liria për protestë dhe kritikë. Prandaj, për ne është e papranueshme çfarëdo përpjekje për cenimin e tyre”, thuhet në njoftimin e PSD.
