Nga Boldnews.al
Në kulmin e debatit të zjarrtë mes artistëve, shoqërisë civile dhe pushtetit qendror dhe lokal në Tiranë, për çështjen e shembjes së Teatrit Kombëtar dhe ndërtimin e një të riu me shtatë kulla si haraç, foli edhe ai, Erion Isai quhet.
Aktori i humori nga Kolonja, iu ngjit pas adashit të tij Erion Veliaj dhe doli pro shembjes së Teatrit Kombëtar. Djalë i zgjuar thonë, i nuhaste benefitet e pushtetit, e krahas Lali Erit, pullë poste i rrinte edhe Elisa Spiropalit. Shpërblimi nuk vonoi. Vetëm dy javë pasi humoristi që të dh… së qeshuri, mbajti flamurin e organizatës: “prishje teatri e ndërtim kullash”, mori postin e Drejtorit të Teatrit të Kukullave në Tiranë.
“Në mbështetje tё nenit 100 të Kushtetutës dhe të pikave 1 e 3, të nenit 9, të ligjit nr.10352, datë 18.11.2010, “Për artin dhe kulturën”, të ndryshuar, me propozimin e ministrit të Kulturës, Këshilli i Ministrave vendosi, Erion Isai emërohet drejtor i Qendrës Kombëtare tё Kulturës për Fëmijë dhe Teatrit tё Kukullave”-thuhet në vendimin e datës 31 maj të vitit 2018.
Më parë ishte bërë i njohur në spektaklin satirik “Portokalli”, në rolin e një “vajze periferike” që erdhi në Tiranë dhe u qepej pas meshkujve me para, kundrejt seksit, si një “studente konviktore”. Ndonëse humor, mbetej një rol që diskriminonte.
Ashtu e nisi punën djali me rrënjë nga Kolonja, që me kalimin e kohëve kuptoi se aktrimi nuk është nuk është vetëm pasion, por edhe formë për tu bërë i njohur, e si i tillë, ti ngjitej pas politikës. Gjithnjë nga ana që ia tërhiqte gjaku, Rilindja.
Sot ai është një nga 61 kandidatët e përzgjedhur të Partisë Socialiste për zgjedhjet e pushtetit lokal. I është besuar me “unanimimet Rilindje” kandidatura për Bashkinë Kolonjë.
Miqtë e fortë të partisë ia njohin “vlerat” organizative. Ia njohën kontributin në fushën e servilizmit, (kjo u pa në momentin që doli haptas pro prishjes së Teatrit Kombëtar), ndaj në rastin e tij shpërblimi nuk ka munguar. Ai kërkon ti ikë së shkuarës ne rolet e “bastarduara”, në disa raste bënte edhe rolin e klounit, aq të dashur për fëmijët. Tashmë ka veshur kostum e kollare, vendosur dhe syze “intelektuali” dhe tashmë mezi pret të ulet në karrigen e Kryetrit të Bashkisë së Kolonjës. Pa kandidat rival, pasi opozita ka vendosur bojotin e zgjedhjeve.
Në çdo rast, sido që të shkojë, Kolonja do ketë një “Deli djalë” si Kryetar Bashkie. Madje, ata shpresojnë se duke qenë njohës i mirë i afrimit me të pushtetshmit, edhe ashtu me shumë humor, mund të marrë fonde për ta bërë Kolonjës një qytet Europian… Kanë nisur ta besojnë këtë në Kolonjë. Ka ecur ai djalë thonë! Në krahë do ketë edhe një “superdeputete” si Elisa Spiropali. Edhe ajo ka kapur majat…!
