Kreu demokrat Lulzim Basha nga drejtoria e Policisë së Tiranës tha se vetëm pak orë më parë junta kriminale e Edi Ramës e shndërroi kryeqytetin në një fushë beteje me qytetarët, që u bashkuan në një protestë për të kërkuar të drejtat e tyre, që do e bëjnë Shqipërinë Europë.
Basha tha se junta kriminale iu përgjigj me akte kriminale aspiratës së shqiptarëve të bashkuar për liri dhe demokraci.
“E kanë të kot, shqiptarët nuk ndalen, opozita nuk ndalet. Që nga dita kur Rama mori pushtetin me bandat e krimit u asgjesua çdo institucion.
Parlamenti nuk përfaqëson demokratët, socialistët, shqiptarët, por ata përfaqësojnë llumin, faqen e zezë të këtij vendi”, tha Basha.
Sipas tij, sot e gjithë Shqipëria është e bashkuar kundër një grupi horrash, që kanë instaluar juntën në vend.
“Maduro i Ballkanit i ka orët e numëruara. Skenari i dhunës që vuri dje në lëvizje me kriminelë të veshur me uniformën e shtetit, tregoi qartë se i vetmi njeri që është i interesuar për dhunë, është maduro i Ballkanit, që do të marrë nesër përgjigjen e merituar.
Dje duke dhunuar Sait Dollapin, junta dha mesazhin për të trembur shqiptarët. Por nesër do t’i përgjigjemi në mënyrë proporcionale dhunës së juntës.
Duhet të çlirojmë një orë e më parë vendin nga kjo juntë. Zgjedhja sot është o me juntë kriminale, o me popullin e bashkuar për liri dhe demokraci”, tha Basha.
Sipas tij, beteja do të vazhdojë në çdo shesh, në çdo rrugë, nuk do të ndalet.
