Kryeministri Edi Rama ka reaguar ndaj protestës së djeshme të opozitës, ndërsa ka marrë rolin e kryepolicit.
Rama tha se goditja që iu bë Seit Dollapit, Sekretar Organizativ i PD-së, në ato sekonda erdhi pas 7 orë dhune, flakë e gurë, presioni shtazarak që iu bë punonjësve të policisë.
Madje Rama, shkoi edhe më tej kur tha se mirëkuptonte edhe ata të dy punonjës policie, që bënë një veprim të tepërt, siç e gjykojmë ne nga ekrani.
“E pati një arsye që policia reagoi ndaj atij që iku me vrap, i cili mund ta pësonte edhe më keq, në një vend shumë më të zhvilluar dhe me demokraci më të konsoliduar sesa ne”, tha Rama.
Ndërsa bëri një krahasim mes protestës së djeshme dhe asaj të 21 janarit 2011, Rama tha se 8 vite më parë kryeministria nuk u qëllua as me guricka, jo më me bomba molotov, duke shtuar se në protestën e djeshme u hodhën bomba Molotov dhe shishe me benzinë ndaj godinës dhe uniformave të policisë.
“Në këto momente kur padiskutim, të gjithë shqiptarët i kanë sytë mbërthyer te ekranet dhe faqet e lajmeve si rezultat i gjithë asaj u shfaq mbrëmë në formën një manifestimi të dhunës, më duket se e para është të ruajmë qetësinë dhe vetë-përmbjajtjen dhe padyshim vendosmërinë që të mos lejojmë që një grupim i udhëhequr nga verbëria e dëshpërimit të influencojë më shumë se ç’duhet në mënyrën tonë të të jetuarit.
Vlerësoj dje respektoj punën e policisë së shtetit. Policia tregoi një profesionalizëm të admiruar dhe kanë vendosur një standard krejt të ri për historikun e uniformave blu”, u shpreh Rama.
Kryeministri theksoi se nga mesazhet që ka marrë nga qytetarët i është kërkuar të veprohet me forcë dhe të arrestohen, por shtoi se ne nuk jemi si ata, që vranë 4 protestues të pafajshëm.
“As më shkon mendja që ata meritojnë plumbin, por meritojnë të përballen me ligjin për veprimet që kanë ndërmarrë.
Ne s’kemi ardhur në pushtet që të bëjmë si ata. Ndëshkimin e këtyre rrugëhumburve e kërkojnë me të drejtë njerëzit, por qeveris s’mund t’a bëjë këtë”, tha Rama, duke shtuar se “kokat e gjithë kësaj veprimtarie të paligjshme dhe të turpshme, kanë frikë të përballen me drejtësinë, pasi kurrë nuk e kanë dashur dhe kurrë nuk do e duan reformën në drejtësi me përballjen me të, pasi kanë frikë si djalli nga temjani”.
Rama shprehu bindjen se qeveria nuk goditet as nga 7 orë, as nga 70 orë, as nga 7 mijë orë, por goditet Shqipëria, përveç atyre burrave, grave, djemve dhe vajzave që janë të veshur me uniform.
“Kush fitoi nga ai 7 orësh i sulmit? Askush! Kush humbi? Humbi çdokush nga ata që erdhën në protestë”, tha rama, duke shtuar se “udhëheqësit e tyre rrugëhumbur i kanë punët në rregull”.
