Kryeministri Edi Rama pohoi sot se ai është problem.
“Patjetër që unë jam problem sepse nuk më mundin dot”, tha Rama.
Ai tha se gjatë gjithë kohës dje kanë marrë ujë dhe do të vazhdojnë të marrin ujë sipas protokollove, duke iu përgjigjur në këtë mënyrë pyetjes nëse është i gatshëm që në vend të benzinës ti hedhë ujë situatës politike në vend.
Përsa i takon përdorimit të gazit, Rama theksoi se ai është lëndë importi që përdoret në çdo vend demokratik.
“Nuk kam dëgjuar askund në Francë që të thotë se po na helmon qeveria me gaz, jo opozitën atje, që janë në luftë a vdekje me Presidentin, po as nga ata me jelekë të verdhë, që të thonë se do të çojmë Presidentin në gjyq se po na hedh gaz”, tha Rama.
Sipas tij, çfarë do të ndodhte sikur policia të mos përdorte gaz? “Gazi prandaj është prodhuar, që policia ta përdorë, që të largojë turmën nga vandalizimet.
Këta thonë se duam të ndezim flakë institucionet, madje tetoria është se ne përdorim Molotov se ju s’na lini të hyjmë brenda institucioneve, por ju s’duhet të përdorni gaz.
Po çfarë të përdorim ne? i gjuan policisë, i pret gishtat dhe e bën për spital, i hedh policisë shishe me benzinë, dhe çfarë duhet të bëjë policia?”, tha ai.
