Pas Prokurores së Përgjithshme të Përkohshme, Arta Marku, e cila mëngjesin e sotëm ishte në Kryeministri, një tjetër zyrtar i lartë, kreu i SHISH-it, Helidon bendo, është takuar me kryeministrin.
Burime qeveritare bëjnë të ditur se Bendo ka qenë i pranishëm në godinën qeveritare pak më vonë se në zyrën e Ramës, të shkonte kryeprokurorja e përkohshme.
Mësohet se në qendër të takimit ka qenë protesta e opozitës, ku nuk munguan përplasjet, incidentet dhe dhuna e policisë ndaj protestuesve, mes të cilëve edhe Sekretarit Organizativ të PD-së, Sait Dollapi.
E ndërsa për Markun është raportuar që Kryeministri ka parashtruar kërkesën që hetimet të drejtohen nga Krimet e Rënda, kërkesë e cila duket se është refuzuar, kreu i SHISH duket se ka dhënë informacionet e shërbimit sekret mbi protestën apo situatën në vend.
Ndoshta kryeministrit i janë vënë në dispozicion informacionet e mbledhura nga SHISH në Tiranë dhe rrethe mbi skenarët e mundshëm të aksionit opozitar, ose janë marrë udhëzime prej tij, lidhur me objektin e punës së shërbimit sekret.
Mënyra sesi ministri i Brendshëm, Sandër Lleshaj, ish-këshilltari për Sigurinë i Kryeministrit Rama, trajtoi protestën e opozitës, duke e cilësuar si skenar destabilizues, hedh dritë mbi atë sesi do të operojnë institucionet e varura ose të “pavarura” ose se çfarë mund t’u kërkohet atyre nga Qeveria.
Duket se kësaj mënyrë të interpretimit i ka shërbyer edhe takimi i mëngjesit të sotëm në selinë e qeverisë të kryeprokurores, kreut të SHISH dhe kryeministrit.
