Kreu demokrat Lulzim Basha ka thirrur një mbledhje urgjente të strukturave drejtuese të PD-së, grupit parlamentar dhe Kolegjin e Kryetarëve.
Mbledhja ka nisur rreth orës 00: 15, dhe në të pritet të merret një vendim mbi vijueshmërinë e strategjisë së opozitës, pas dhunës së ushtruar nga Policia e Shtetit ndaj protestuesve.
Basha kërkoi mirëkuptimin e mbështetësve për të cilët hapi edhe katin e parë të selisë blu.
Beteja politike e opozitës dhe qytetarëve shqiptarë, tha Basha, do të vazhdojë deri në çlirimin e Tiranës dhe gjithë Shqipërisë nga qeveria e lidhur me krimin.
“U bëj thirrje të gjithë strukturave drejtuese të PD dhe koalicionit opozitar për të marrë vendimet pas shpalljes së luftës nga Edi Rama popullit të tij.
Duke ju falenderuar nga zemra për këtë qendresë të paprecedent në historinë e Shqipërisë që dëshmon më mirë dhe më qartë se çdo fjalë vendosmërinë tonë për të mos lejuar më kurrë diktatin e krimit dhe skllavit të tij kriminel Edi Rama.
Ju kërkoj mirëkuptimin për kohën që do të na duhet për të marrë vendimin për mënyrën sesi do të na duhet që të vazhdojmë betejën tonë, sepse beteja do të vazhdojë deri sa ti japim fund politikës së lidhur me krimin, derisa ta çlirojmë Tiranën dhe Shqipërinë nga qeveria e lidhur me krimin dhe derisa ti japim perspektivën europiane.
Ju jeni protestues, ju jeni qytetarë, ju jeni prindër, por ju jeni sot ushtria demokratike, armata e lirisë dhe Europës, shpresa e vetme që ky vend të bëhet si gjithë Europa. Ndaj kërkoj mirëkuptimin tuaj për takimin urgjent që kam thirrur me gjithë strukturat drejtuese. Zoti ju bekoftë ju, liri, demokraci! Nëse dëshironi, jeni të mirëpritur në katin e parë të partisë apo këtu përreth”, tha Basha, nga selia e PD, pak momente para nisjes së mbledhjes me strukturat.
