Botuesi i “55”, gazetari Fahri Balliu ka reaguar për arrestimin e të birit, ish-deputetit, Klevis Balliu.
Balliu u arrestua dy ditë më parë, ndërsa u la i lirë sot nga gjykata. Ish-deputeti i PD, u akuzua se kishte kundërshtuar me dhunë punonjësit e policisë, por sot në gjykatë nuk u paraqitën prova.
Duke folur në “Top Talk”, pasditen e sotme, Fahri Balliu, tha se arrestimi ishte i padrejtë dhe se drejtorët e policisë kishin marrë urdhër politik. Po kështu ai përmendi si argument se janë të lirë trafikantë droge, ndërsa arrestohet i biri i shkolluar jashtë vendit.
“Një gjë mund ta them me bindje: Të çojnë prapa hekurave, e nëpër gjykata djemtë që kanë studiuar në Londër dhe që janë si Klevisi, apo qindra të tjerë që nuk po gjejnë përgjigje në Shqipëri është një trishtim shumë i madh”, tha Fahri Balliu.
Në vijim ai shtoi se “nga pikëpamja shoqërore, nuk ka rëndësi nëse është i Fahriut apo i dikujt tjetër, por kur gjithë trafikantët e drogës i ke rrugëve, edhe për hajdutët e Rinasit që skemi asnjë lajm, megjithë këto të zeza, shkojmë çojmë deputetët e opozitës në dyert e gjykatave është një trishtim shumë i madh”.
“Policia ka luajtur një rol ekstremisht negativ, në gjithë këtë histori. Ne zotërojmë me dokumenta të gjithë dhe në momentin e duhur do i shpallim. Unë jam gazetar, dhe di t’i lexoj veprimet. Një shëmti, e gjitha një histori që nuk na nderon, na turpëron, por turpi është i qeverisë dhe i atyre që i shkaktojnë dhe që u bëjnë presion duke u nisur nga fuqia e postit dhe e mandatit të vjedhur. U bëjnë presion drejtorëve të policisë, shefave të rendit, prokurorisë, i dimë emrat e të gjithëve”, tha Fahri Balliu.
Save
Share
