Gazetarë dhe analistë në studion e emisionit “Opinion” janë habitur nga deklarimet e Presidentit të Kosovës Hashim Thaçi, sipas të cilit idea e tij nuk është për shkëmbim territoresh, por për korrigjim kufijsh.
Thaçi theksoi se asnjëherë nuk ka folur për shkëmbime territoresh, duke shtuar se idea e tij për korrigjimin e padrejtësive historike mund të pranohet nga Serbia për shkak të perspektivës europiane të saj.
Por Blendi Fevziu në një moment tha “duhet të gjesh vetëm ndonjë budalla që të pranojë këtë idenë tuaj, atë të marrjes së territoreve pa dhënë gjë”.
I pyetur sepse nuk ishte i pranishëm në drekën e organizuar nga Presidenti Ilir Meta, Thaçi shpjegoi “ishte më tepër aspekt teknik, por në të njëjtën kohë vlerësoj se të takohem me presidentët e dy vendeve që nuk e kanë njohur Kosovën është e panevojshme, prandaj që të ishte sa më relaksuese atmosfera, ishte e panevojshëm vazhdimi i debatit. Pastaj është edhe pozicioni armiqësor që Bosnja-Hercegovina, nganjëherë mban një pozicion më të ashpër se Serbia. Bosnja duhet të ndryshojë qëndrimin ndaj Kosovës”.
