Në një kohë kur kandidatë të përfshirë në listat e PD dhe LSI po plotësojnë vakancën në Kuvend duke marrë mandate deputetësh, në rrjet ka plasur gallata për ata që cilësohen rëndom si “opozita e re”.
Të mandatuarit e rinj duket se po i krijojnë komoditet Edi Ramës me praninë e tyre në sallën e Kuvendit, ku herë pas here me fjalimet apo veshjet e tyre, ngjasojnë me “lolot e dikurshëm të Mbretit”.
Reagimet në rrjet janë të shumta, veçanërisht ndaj deputetëve që kanë marrë përsipër të luajnë rolin e opozitarit, por pa e ditur as vetë se kë përfaqësojnë.
Kanë hyrë në atë që quhet tempulli i demokracisë duke pasur fatin që të kenë emrin në listat e kandidatëve për deputet të partive që kanë dorëzuar mandatet, por sapo marrin mandatin se kanë për gjë të deklarojnë se i përkasin formacioneve politike, që vështirë se njihen apo dihet se ekzistojnë.
Për një arsye apo një tjetër ato janë sot deputetë dhe veç gallatës së momentit që krijojnë, apo frymëmarrjes që i japin një mazhorance pothuajse të kapitulluar brenda dhe jashtë vendit, e vetmja fitore e “opozitarëve të rinj” është ajo që emri i tyre do të shkruhet në librin e legjislaturave parlamentare, nëse do të botohen, si ligjvënës, qoftë edhe të përkohshëm.
Në rrjet cilësohen si b*thëlëpirës, ndërsa tallja shkon edhe më tej kur cilësohen si muskëtierë. Në këtë rast nuk ngjasojnë me muskëtierët e Alexandre Duma, por mund të cilësohen si të Edi Ramës…
