Federica Mogherini, shefja e diplomacisë së Bashkimit Europian, renditi sot në një konferencë të përbashkët për mediat me kryeministrin Edi Rama, tre sukseset e Shqipërisë.
Mogherini tha se çelja e negociatave është në interes të dy palëve, ndërsa shtoi se shpreson në një vendim pozitiv lidhur me këtë proces.
“Keni treguar rezultate konkrete për reformat. Ju përgëzoj për punën që keni bërë. Besoj që ju po kaloni një proces transformimi të Reformës në Drejtësi.
Është arritur me reformën, ju keni arritur të keni një reformë që do ishte shembull edhe për disa nga shtetet anëtare të BE. Vettingu ka sjellë rezultate të prekshme. Ne e shohim sa krenarë janë shqiptarët për vettingun. 80% e qytetarëve shqiptarë e mbështesin”, tha ajo.
Mogherini renditi si arritje të dytë uljen drastike të kultivimit të kanabisit, për të cilën tha se po sjell rezultate mbreslënëse.
Ndërkohë, arritja e tretë sipas Mogherinit, ishte shpërbërjen e grupeve kriminale.
“Ne duhet të jemi mbështetës ndaj Shqipërisë për të objektivin e saj drejtë BE-së. Është përgjegjësia jonë që ne të njohim punën tuaj dhe të japim vlerësime pozitive.
Besoj se çelja e negociatave në qershor është i arritshëm, por nuk duhet ta marrim lehtë. Ti përdorim javët në vijim për të punuar që shtete anëtare të BE-së të njohin punën e tyre.
Vazhdoni jepni kontributin tuaj duke komunikuar me miqtë tuaj europianë që të kenë më shumë besim te Shqipëria dhe e ardhmja jonë europiane”, u shpreh Mogherini.
