Pasi dështoi sërish në mënyrë spektakolare për të 6-n herë radhazi, duke mos arritur të bëjë as edhe një milimetër përpara drejt BE-së, kryeministri Edi Rama, është kthyer të flasë sërish për çështjen kombëtare dhe patriotizmin.
Ai u kujtua vetëm sot që tabelat në jug të Shqipërisë flasin greqisht, dhe paturpësisht deklaroi se brenda javës ato do të rikthen sërish në gjuhën shqipe, madje nuk nguroi të tregonte dhe sa i nevrikosur ishte për këtë skandal.
Por pse pikërisht sot Rama vendosi të nxjerrë ‘Luanin’ dhe të flasë për Shqipërinë dhe kufijtë shqiptarë?
Sepse sot Rama nuk ka si ti gënjejë më shqiptarët, nuk ka më as se kë të fajësojë (Opozitën jo e jo, sepse është jashtë parlamentit), nuk ka më kujt ti vërë gishtin si fajtor për mos hapjen e negociatave.
Dhe meqë gjithçka po shkon për dreq për të e qeverinë e tij, Rama u kujtua që shqiptarët janë patriotë të mëdhenj dhe ‘voila’, doli të flasë për tabelat greke që po pushtojnë Shqipërinë.
Por sot jo tabelat greke, por as pushtimi i Greqisë, nuk do ta shpëtonte rënien e lirë të qeverisë së tij drejt humnerës, patriotizmi i shtirur jo e jo.
Kthimi i tabelave në gjuhën shqipe është detyrim ligjor dhe Kushtetues, i cili duhet të ishte bërë menjëherë sapo ngjarja u denoncua, dhe jo të përdorej si mbulesë e dështimeve. /Boldnews.al
