Që të ulet Lulzim Basha dhe të negociojë me Edi Ramën si kryeministër është njëlloj si të puthesh me Judën.
Kështu deklaroi ish-kryeministri Sali Berisha në studion e Oranews, duke iu përgjigjur kështu pyetjes nëse do të ketë një takim mes Bashës dhe Ramës.
Berisha tha se opozita njohu zgjedhjet, megjithëse shkeli shumë rregulla gjatë fushatës, por dalja e provave, që sot janë në dorën e prokurorisë, tregojnë se Rama dhunoi me çdo mjet zgjedhjet, pavarësisht besimit që iu dha.
Ish-kryeministri theksoi se të gjithë deputetët që kanë hyrë në Kuvend përtej afatit 1 mujor është anti-kushtetues, pasi dokumenti themeltar i shtetit e ka të përcaktuar qartë këtë afat.
“Kushdo që ka hyrë në Kuvend përtej këtij afati është anti-kushtetues”, tha Berisha, duke komentuar në këtë mënyrë plotësimin e vakancës në Kuvend.
