Ndërtimi i 3 HEC-eve në Bulqizë është kundërshtuar nga banorët e zonës, ndërsa i kanë bërë thirrje qeverisë që të ndalojë projektin.
Një prej banorëve që ishte në protestë para njësisë Administrative Fushë-Bulqizë, u shpreh se kjo gjë që po bën qeveria tani nuk e ka bërë ansjë nga pushtuesit.
“Ato persona që bëjnë këtë punë ja kalojnë dhe pushtuesit më të egër që ka parë Shqipëria. Jemi pushtuar, prej Turqisë e Serbisë ujin nuk e ka marrë askush. Këta duan që të na marrin burimin tonë të jetës. Të mblidhemi i madh e i vogël, me kazma e t’i shkatërrojmë mos të lejojnë të shkelin këmbën në tokat tona”, shprehet banori.
Kjo protestë është bërë publike dhe nga disa faqe në rrjetet sociale, si “Reago për Mirditën” dhe “Bulqiza ime”, të cilat shprehen kundër ndërtimit të HEC-eve të reja, duke hedhur akuza tek ministrat Blendi Klosi dhe Belinda Balluku.
POSTIMI I REAGO PËR MIRËDITËN
Drama e re që po luhet në kurriz të shqiptarëve. Pasi u morën pasuritë minerare, pasi u zhveshën malet nga pyjet, tani duan tu përvetësojnë dhe ujin! Siç po veprojnë në Mirditë me 12 leje të reja HEC-sh, njëlloj edhe në Bulqizë, ministri Blendi Klosi kërkon që të liçensojë 3 Hec-e, të cilat nëse ndërtohen i lënë banorët pa ujë, pa bukë, pa jetë! Por uzurpuesit e rinj, pushtetarët e korruptuar si ministri Klosi dhe kryetarët e bashkive në zona, i kanë bërë hesapet gabim, pasi në Mirditë, Bulqizë, Mat, Kukës e në gjithë Shqipërinë ka akoma burra e gra që do dinë ti dalin për zot trojeve të tyre, pasurive të tyre nga grabitja!
POSTIMI I BULQIZA IME
Takimi thirrur nga administratori i Njësisë Administrative Fushë – Bulqizë, Agron Boja me banorë të tre fshatrave Dushaj, Koçaj dhe Dragu për të diskutuar lidhur me ndërtimin e tre HEC-eve në këtë zonë është kthyer në protestë. Ky i fundit e kishte thirrur takimin vetëm 1 ditë para dhe pa njoftuar të gjithë banorët. Banorët u shprehën të vendosur se do ta mbrojnë ujin deri në fund dhe me jetën e tyre, duke ju bërë thirrje firmave të cilat kanë projektuar ndërtimin e HEC-eve që të largohen sa nuk është vonë, dhe ministrave të linjës Belinda Balluku dhe Blendi Klosi që ti japin zgjidhje këtij problemi. Në zonën e Fushë – Bulqizës janë projektuar për t’u ndërtuar tre HEC-e të cilat kanë hasur në kundërshtimin e fuqishëm të banorëve.
