Nga Boldnews.al
Të vorfnit sot janë në qeli. Hajdutët e vegjël dergjen burgjeve, shpërndarësit dozave të vogla të drogës quhet “trafikantë të mëdhenj”, protestuesit kundër qeverisë mbahen të izoluar, dritën e diallit nuk shohin me sy. Po shtohen çdo ditë. Burg, burg, burg, artikulon kryeministri Rama në çdo takim.
Këta janë armiqtë e pushtetit… Ndërsa fjala korrupsion, që na ka nxirë në çdo raport ndërkombëtar, përfshi edhe Departamentin Amerikan të Shtetit nuk ekziston në procedimet e prokurorisë. Sa zyrtarë sot janë në qeli për korrupsion?
“Evidentohet në shifra minimale referimi i veprave penale të korrupsionit të zyrtarëve të lartë dhe të zgjedhurve vendorë me 3 referime dhe në sistemin e drejtësisë 7 referime edhe këto me mangësi në të dhëna, megjithëse shihet si një domosdoshmëri në luftën kundër këtij fenomeni mjaft shqetësues. Për këtë kategori subjektesh mungon roli aktiv i strukturave përkatëse të Policisë së Shtetit, për të kërkuar dhe mbledhur informacione për veprat penale të korrupsionit, me qëllim regjistrimin e procedimeve penale dhe kryerjen e hetimeve proaktive”. Ky është ekstrakti i raportit të Prokurorisë së Krimeve të Rënda për procedimet ndaj zyrtarëve të lartë dhe të sistemit të drejtësisë për vitin 2018 për akuzën e “Korrupsionit të zyrtarëve të lartë publik”.
Me këto të dhëna, me dosje as sa gishtat e njërës dorë sot po “luftohet” korrupsioni i zyrtarëve të lartë. “Ndër grupveprat penale të hetuara përgjatë vitit 2018, të mbartura dhe regjistruara veprat penale të korrupsionit (69 procedime)”, thuhet në reagimin e prokurorisë, ku mësohet se 64 janë të mbartura nga viti 2017, ndërsa vetëm 5 raste në kohën kur Arta Marku ka marrë detyrën e Prokurores së Përgjithshme.
Por burgjet duhen mbushur, kapacitetet nuk ka… Qeveria do të mendojë për një burg të ri me PPP, ose konçension. Një oligark me siguri do të shfaqet për të paraqitur një “ofertë të pakërkuar” dhe qeveria do të jetë gati të lëshojë miliona euro për një burg të ri, si gjithnjë me akuzat se në çdo PPP, fshihet një aferë korruptive. Por korrupsioni nuk po konsiderohet më “vepër penale”… Kushdo që e realizon quhet “i zoti”…! Madje janë të gjitha mundësitë që ky term të hiqet fare, korrupsioni të “legalizohet”…!
Qelitë janë të destinuar për “banorët e rinj” që do të përballen me drejtësinë në duart e Ramës. Ashpërsimi i Kodit Penal për akuzën: “Goditje për shkak të detyrës”, është një mundësi më shumë që shqiptarët të përfundojnë burgjeve. Në protesta mund të ketë edhe konfrontime me policinë.
Terrori vjen më pas, arrestime të dhunshme dhe “kalbje në burg” për çdo protestues që në revoltën ndaj qeverisë mund të shkaktojë edhe incidente, duke rrezikuar deri në 5 vite burgim.
Janë të gjitha mundësitë që të rikthehet neni 55. “Agjitacioni dhe propaganda kundër pushtetit të Ramës”, 10-5 vjet burgim
