Nga Boldnews.al
Kryeministri Edi Rama sot do jetë përballë kancelares gjermane Angela Merkel. Rilindja mezi pret atë çast për të shpërndarë një foto, por takimi nuk do të jetë rutinë. Rama do të rrëfehet për nismën që për pak mund t’i vinte Ballkanit shkrepësen, pasi baruti aty është gjithnjë gati. Nuk do flitet as për pikturat abstrakte të Ramës, por për “tablonë” e djallit që mund të realizohej në Ballkan, pas idesë së shkëmbimit të kufijve Kosovë-Serbi.
Në vizitën që Merkel bëri në Tiranë pesë vite më parë dhe në një tur të saj në rajonin tonë, ajo iu dha një mundësi të gjithë vendeve të zonës së trazuar që të rrisnin ekonominë, forconin demokracinë dhe në një të ardhme të afërt ta shihnin veten në BE.
Rama ishte këqlexuesi më i madh i mesazhit dhe qëllimit të kancelares, këtu e pesë vite më parë. Gjykoi nën haluçinacione se ai ishte përcaktuar si “lider rajonal”, e mbi Ramën do vareshin politikat e mëdha, jo vetëm në Ballkan, por edhe në Europë.
Nismëtar apo mbështetës i zjarrtë mbetet për tu parë, por kryeministri ynë dyshohet se ishte nxitësi i përhapjes së idesë së korrigjimit të kufijve Kosovë-Serbi, bashkë me Vuçiç dhe Thaçin. Dy “shqiptarët e mëdhenj”, Thaçi dhe Rama, e elaburuan këtë ide, por kjo nismë, do sillte përkohësisht paqen Kosovë-Serbi, ndërsa hapte vatra të tjera konfliktesh, të cilat rrezikonin të përfshinin gjithë Ballkanin.
Sipas tezës që më së shumti është “elaburuar publikisht” nga Baton Haxhiu, Kosova jepte Mitrovicën e Veriut Serbisë, ndërsa merrte sipas planit një pjesë të Luginës së Preshevës.
Gazeta e njohur gjermane “Süddeutsche Zeitung” i ka quajtur eksperimente me eksploziv planet e presidentit serb dhe përkrahësve të tij nga Prishtina dhe Tirana për ndryshimin e kufijve të Kosovës. Sipas gazetës, në samitin e Berlinit me vendet e Ballkanit që e organizojnë kancelarja gjermane Angela Merkel dhe presidenti francez Emmanuel Macron, në qendër të vëmendjes nuk do të jenë mangësitë e shteteve që aspirojnë të hyjnë në BE, por një gabim fatal i Bashkimit Europian.
Këtu futet edhe Frederika Mogerini, e cila nxiste këtë lloj dialogu, që në fund gjithsesi mund të kurorëzohej me marrëveshjen Kosovë-Serbi, që për Markel dhe Macron konsiderohet me shumë rrezik për hapjen e konflikti të madh në të gjithë ballkanin.
“Kush e bën këtë, ai rrezikon dhe provokon shpërthimin e konflikteve të reja nga shteti me tre popuj të quajtur Bosnjë deri në Maqedoninë e Veriut me pakicën e fuqishme shqiptare. Me konceptin e ndryshimit të kufijve u jepet të drejtë pa kurrfarë zori atyre nacionalistëve që në luftërat e viteve ’90, përkundër gjithë brutalitetit nuk arritën cakun e shteteve etnikisht homogjene. Me idetë për ndryshimin e kufijve tradhtohet edhe ideja themelore europiane, e cila si zgjidhje të konflikteve nuk parasheh ndarjen, por bashkëpunimin dhe e cila nuk i shtynë kufijtë, por i bën ata mundësisht të parëndësishëm”, shkruan “Süddeutsche Zeitung”.
Pikërisht kjo do jetë tema e nxehtë përballë Merkel dhe Macron, ku kryeministri ynë Edi Rama nuk ka si të dalë pa i “përvëluar duart”. Por shitja do jetë e ndryshme. Rilindja po e bën gati njoftimin dhe përhapjen e lajmeve të rreme se takimi ishte mbështetje për rrugën që Shqipëria ka ndërmarrë në integrimin e vendit…! Një sport i rëndë për piktor-basketbollistin, që për disa vite ia mbushi mendjen vetes se ishte “lider rajonal” e pse jo në të ardhmen të vetëquhej global! Sot është dita e rrëfimit, para se të shkojë në “purgatorin” politik.
