Ka përfunduar pas 60 minutash takimi në selinë e PD-së, mes kreut demokrat Lulzim Basha dhe aleatëve të tij, Nard Ndoka, Vangjel Dule, Dashamir Shehi, Agron Duka dhe Fatmir Mediu.
Në takim sikundër raportohet është diskutuar mbi platformën e paraqitur nga 4 partitë e vogla, aleate të PD-së, mbi zgjidhjen e krizës politike në vend.
Nesër drejtuesit e 4 partive, në orën 11:00 do të nisin një takim me Presidentin Ilir Meta, të cilit i kanë kërkuar të thërrasë tryezën e partive, për gjetjen e zgjidhjeve mbi krizën politike në vend.
Kushti që kanë partitë e opozitës është dorëheqja e Edi Ramës nga posti i kryeministrit dhe krijimi i një qeverie tranzitore që do të përgatisë terrenin për zgjedhjet e parakohshme parlamentare.
Gjithashtu partitë e opozitës shprehen të bindura se në 30 qershor s’mund të ketë zgjedhje me njërën palë.
“Platforma e bërë publike sot nga ne është bazë e mirë për të nisur përpjekjen me të gjitha palët për zgjidhjen e krizës.
Ju e patë që në Berlin askush nuk e përcaktonte situatën në Shqipëri si normale. Zgjedhje më 30 qershor me një palë nuk do të ketë. Arroganca e z. Rama nuk i shërben objektivit që kanë shumica dërrmuese e shqiptarëve”, tha Vangjel Dule, pas takimit në selinë e PD.
Ndërkohë që Fatmir Mediu, kryetar i PR-së, theksoi se Edi Rama nuk mund të pranohet si pjesë e zgjidhjes, pasi ai është shkaku i krizës. “Problem për ne mbetet kryeministri Edi Rama, i cili s’mund të jetë pjesë e zgjidhjes”, tha Mediu.
Takimi i Bashës me aleatët zhvillohet një ditë para takimit në Presidencë, që duket se do të jetë i pari në tentativën për zgjidhjen e krizës politike në vend, e cila mund të precipitojë dhe mund të shkojë deri në përplasje civile.
