Akil Kraja, përfaqësues i Partisë Demokratike, duke iu referuar shifrave zyrtare, deklaron se bashkia e Tiranës ka aprovuar 1 miliard euro ndërtime të reja vetëm gjatë tre viteve të fundit. Sipas Krajës, kjo është vlera sipas çmimit reference, çka nënkupton që vlera e tregut e lejeve të akorduara është padyshim dhe më e lartë.
“Ndërkohë që bashkia lufton këmba këmbës me “evazionin fiskal” të shitësve ambulantë, më e moralshme dhe urgjente do të ishte të luftonte etiketimin e pa-evitueshëm si “krye-lavatriçja” e parave të krimit në rajon”, shkruan ndër të tjera ai.
Reagimi i plotë i Akil Krajës:
1 MILIARD euro ndërtime të reja aprovuar në 3 vitet e fundit 2016/18 nga Bashkia Tiranë.
Kjo është vlera sipas çmimit reference, çka nënkupton që vlera e tregut e lejeve të akorduara është padyshim dhe më e lartë.
Ndërkohë që Bashkia lufton këmba këmbës me “evazionin fiskal” të shitësve ambulantë, më e moralshme dhe urgjente do të ishte të luftonte etiketimin e pa-evitueshëm si “krye-lavatriçja” e parave të krimit në rajon.
E kam shprehur dhe në shkrime të mëparshme. Personalisht, e shoh sektorin e ndërtimit si jetik në zhvillimin e mëtejshëm të qytetit. Madje mbështes fuqimisht dhe ndërtimin e një distrikti financiar/shërbimesh teknologjike të mirëfilltë në zgjatimin e bulevardit të ri të Tiranës, ashtu si çdo kryeqytet europian modern e atraktiv për investimet e huaja.
Por shifra e 1 miliardëve, propaganda mashtruese e pyllit orbital, zhdukja e lulishteve, shkatërrimi i trashëgimisë si me rastin e Teatrit Kombëtar, rritja e ndotjes urbane, mos investimi adekuat në rrjetin e ujit të pijshëm e në atë të shkarkimeve, paralizimi i trafikut, braktisja e projektit të Tramit, mungesa e transparencës dhe të konsultimeve publike në shkatërrimin e “lagjeve” të Tiranës, së fundmi përfshirja e Bashkisë në PPP ndërtimesh pallatesh etj etj, të gjitha këto marrë së bashku na çojnë vetëm dy mundësi:
– ose kjo është Bashkia më e pa-aftë, propagandistike e mashtruese që ka njohur ndonjëhere ky vend;
– ose kjo është vjedhja e shekullit me 1
Miliard euro ku një zot e di sa është % e parave që janë paguar nën dorë…
