I veshur me një maskim opozitari, Astrit Patozi, kreu i partisë më të re, ka mbështetur qëllimin e kryeministrit Edi Rama për të shkuar në zgjedhje më 30 qershor.
Qëndrimin, kryetari i Bindjes Demokratike e shprehu pasi në KQZ u votua këtë të shtunë regjistrimi i BD-së në zgjedhjet e ardhshme lokale. Vendimmarrje që erdhi duke injoruar afatet ligjore.
Votimi
Ishte falë votës së 4 përfaqësuesve të mazhorancës socialiste në KQZ, që partia e Patozit arriti të regjistrohej edhe pse duke shkelur kriteret ligjore. Fakt të cilin e vuri në dukje Klement Zguri, i cili ishte i vetmi që votoi kundër duke i mëshuar këtij argumenti.
“Dëshiroj që ‘Bindja Demokratikë’ të garojë në zgjedhjet e 2019, dhe do doja që edhe subjektet të tjera të regjistroheshin në zgjedhje e 30 qershorit. Por kjo mbetet dëshirë. Unë s’mund t’ia lejoj vetes që dëshirat e mia, t’ia vendos ligjit. Data 21 prill ka qenë data e fundit për të sjell të gjithë dokumentacionin ligjorë, dhe tani që flasim që vendimi i gjykatës nuk ka hyrë në fuqi dhe Bindja Demokratike nuk ka lindur dhe të kryer vendime politike. Në zgjedhjet e 2015, kemi votuar 7 me 0 që një subjekt të mos regjistrohet dhe që ishte në të njëjtat kushte që mos regjistrohej. Zgjedhjet janë të qytetarëve, duhet të kenë alternativa të bollshme dhe zgjedhjet të jenë të ndershme dh demokratike, por mbi të gjitha duhet të jenë ligjore. Unë nuk jam i bindur se subjekti në fjalë nuk plotëson kriteret ligjore për të garuar në zgjedhjet”, tha kryetari i Komisionit Qendror të zgjedhjeve.
Reagimi
Astrit Patozi reagoi në Facebook pas vendimit në KQZ, duke mbështetur qëndrimin e Ramës për zhvillimin e zgjedhjeve më 30 qershor dhe duke dalë hapur kudër kauzës së opozitës së bashkuar. Opozita kërkon largimin e kryeministrit dhe formimin e një qeverie tranzitore për përgatitjen e zgjedhjeve të lira e të ndershme.
Duke zgjedhur të ‘godasë’ disi shkarazi qeverinë me vetëm një fjali në reagimin e tij, Patozi njofton se qëllimi përfundimtar është ai i pjesëmarrjes në zgjedhjet e 30 qershorit, njësoj si Rama: “Me këtë rast, ne ftojmë çdo qytetar të këtij vendi, që mendon se Shqipëria po qeveriset keq e mos më keq për shkak të një sistemi të kalbur politik për t’iu bashkuar projektit tonë”. /bn/
