Nga Boldnews.al
Pak ditë para mbylljes së aplikimeve për postin e Prokurorit të Përgjithshëm, deri më tani janë shpallur 3 kandidatë zyrtarë. Krahas dy prokurorëve, Olsian Çela nga Krimet e Rënda dhe Fatjona Memçaj nga Apeli i Tiranës, listës së garuesve për kreun e Akuzës i është bashkuar edhe avokati Lulzim Alushaj.
Juristi Alushaj ka qenë një emër pak i njohur në ambjentet publike shqiptare. Në bazë të të dhënave zyrtare, ai e ndan jetën e tij profesionale dhe personale ndërmjet Shqipërisë dhe Italisë.
Por javët e fundit, emri i tij është bërë publik në disa emisione të televizionit Top Channel. Pak ditë më parë, emisioni “Top Story”, nën varësinë direkte të drejtorit të televizionit, Ben Blushi, u përfshi në një debat të ashpër etik dhe ligjor me drejtuesin e një kompanie farmaceutike.
Në këtë emision, Lulzim Alushaj u prezantua zyrtarisht dhe publikisht si avokat i emisionit “Top Story”, rrjedhimisht i punësuar i Ben Blushit dhe administratores së Top Channel, Vjollca Hoxha.
Në atë emision, avokati Alushaj, në ushtrim të profesionit të tij, mori në mbrojtje Top Story-n dhe paralajmëroi kallëzime penale e padi për shpifje ndaj drejtuesve të kompanisë farmaceutike dhe disa agjencive mediatike on-line, të cilat i kishin dhënë hapësirë debatit mes Top Channel dhe sipërmarrësit privat.
Pasi bëri këtë prezantim publik, Lulzim Alushaj rikthehet në qendër të vëmendjes së opinionit me kandidimin e tij për postin e Prokurorit të Përgjithshëm të Shqipërisë.
Është ende e paqartë nëse avokati Alushaj i plotëson kriteret formale ligjore për të kandiduar për pozicionin që aktualisht mbahet nga Arta Marku. Gjithësesi, Këshilli i Lartë i Prokurorisë (KLP) pritet të marrë në shqyrtim kandidaturën e juristit Lulzim Alushaj, së bashku me kandidatët e tjerë.
Në 29 Mars 2019, Këshilli i Lartë i Prokurorisë shpalli të hapur garën për postin e Prokurorit të Përgjithshëm të Shqipërisë. Në bazë të kësaj thirrjeje, të gjithë të interesuarit, të cilët plotësojnë kushtet ligjore për të kandiduar për numri një të Akuzës, mund të aplikojnë brenda 30 ditëve.
Deri më tani, kur kanë mbetur edhe shumë nga mbyllja e afatit zyrtar, kanë aplikuar 3 juristë. Prokurori i Krimeve të Rënda, Olsian Çela, ishte i pari që dorëzoi dokumentacionin e aplikimit, në fillim të kësaj jave.
Mesditën e së Premtes, pranë Këshillit të Lartë të Prokurorisë dorëzoi aplikimin edhe prokurorja e Apelit të Tiranës, njëkohësisht anëtare e Këshillit të Emërimeve në Drejtësi, Fatjona Memçaj.
Vetëm disa minuta pas Memçaj, KLP pranoi dokumentat e aplikimit të avokatit Lulzim Alushaj.
Tashmë pritet që të dorëzojë aplikimin e saj edhe Kryeprokurorja e Përkohshme, Arta Marku. Drejtuesja aktuale e institucionit, mesa duket do të dorëzojë e fundit aplikimin si kandidate për postin, të cilin e mban “përkohësisht” prej më shumë se 16 muajsh.
