Partitë aleate të Lulzim Bashës, kreu i PD-së, i kërkuan një ditë më parë, Presidentit të Republikës të thërrasë tryezën e forcave politike në mazhorancë dhe opozitë, lidhur me gjetjen e një zgjidhjeje për situatën politike në vend.
Propozimi ndaj Ilir Metës është bërë nga kreu i PR-së, Fatmir Mediu, pas takimit që ai dhe drejtues të partive opozitare zhvilluan me Ambasadorin e BE-së në Tiranë, Luigi Soreca.
Sot Presidenti i është përgjigjur pozitivisht, ndërsa ka caktuar të martën e javës së ardhme si ditën kur do të takohet me drejtuesit e partive të vogla të opozitës.
Po çfarë do t’i kërkohet Ilir Metës nga drejtuesit e partive të vogla?
Fatmir Mediu në Top Talk shprehet se “shikojmë shqetësimin e OSBE/ODIHR, me çështjet që ka Prokuroria në shqyrtim, a janë standardet për zgjedhje të lira e të ndershme?
E dyta është një qeveri që të kujdeset për zgjedhjet. Brenda një kohe të caktuar duhet përcaktuar plani i implementimin që përcakton standardet zgjedhore.
Ndoshta vendoset përfundimisht në Kushtetutë që të ketë një qeverisje kujdestare që të vendoset 6 muaj para zgjedhjeve. Pastaj të shikojmë elemente të tjera”, tha Mediu.
