Çdo të enjte qytetarët do të thirren në protesta nga opozita për të bllokuar akset rrugore.
Është ky vendimi i marrë në mbledhjen e kreut demokrat Lulzim Basha me kryetarët e degëve të PD-së, ndërsa është kërkuar një pjesëmarje e lartë e qytetarëve në këto protesta.
Mësohet se Basha ka kërkuar nga drejtuesit e degëve të PD-së që të intensifikojnë takimet me qytetarët dhe të dalin derë më derë të shpërndajnë mesazhin, duke kërkuar mbështetjen qytetare.
Burime nga PD theksojnë se gjithashtu është kërkuar një bashkërendim dhe intensifikim i bashkëpunimit me strukturat e partive aleate, për të vënë në funksionim koalicionin e krijuar nga opozita, edhe në nivel lokal.
Një ditë më parë, disa mijëra qytetarë iu bashkuan thirrjes së opozitës për të bllokuar 5 akse kombëtare, gjë që çoi që për 60 minuta, të paralizohej qarkullimi. Të vetmet raste që u lejuan të kalojnë në rrugët e bllokuara ishin urgjencat mjekësore.
