Nënkryetarja e LSI-së, Kejdi Mehmetaj, shprehet se nuk beson se ndokush në SHBA nxit krimin e organizuar apo shitblerjen e votës dhe aq më pak opozita false të marrin pjesë në zgjedhje. Është ky reagimi i Mehmetajt në një intervistë për Koha Jonë pas apelit që Ambasada e SHBA-së në vendin tonë, po ju jep të gjithëve atyre kandidatëve që duan të marrin pjesë në zgjedhjet lokale.
“Ne e adhurojmë Amerikën se e idealizojmë si vendin e lirisë dhe demokracisë. Nëse përfaqësues të saj sillen si lobistë të Ramës për të mbajtur në pushtet me forcë këtë regjim kleptokratik, që sipas raportit të DASH e ka kthyer Shqipërinë në bazë operacinale të krimit të organizuar për Europën, për Lindjen e Mesme dhe Amerikën e Jugut, atëherë të marrësh seriozisht lobizmin e tyre me tezat e Edi Ramës, jo vetëm do të thotë të kriminalizosh tërësisht të ardhmen e këtij vendi por edhe e kthen Shqipërinë në bazë të sigurtë të krimit të organizuar dhe të terrorizmit dhe kjo është politikë tërësisht anti Amerikane dhe anti NATO”, tha ajo.
Ish-deputetja e LSI-së, thotë se nuk ka “opozitë të re” por “kukulla të zgjedhura të vendosura me dorë nga Edi Rama në karriget e opozitës në parlament”.
E pyetur se nëse protestat do ta çojnë vendin në luftë civile, ajo pohon se deri më sot protestat janë mbajtur nën kontroll por “askush nuk mund të japë më garanci për qetësi”.
“Që prej protestës së parë të thirrur nga opozita më 16 shkurt, çdo protestë pasardhëse qoftë përpara parlamentit apo në bulevard ka qenë më masive, më domethënëse dhe padyshim shumë përfaqësuese e opinionit dhe ndjeshmërisë së shqiptarëve. Tanimë nuk janë vetëm përkrahësit e partive opozitare ata që protestojnë por të gjithë qytetarët, të gjithë grupet e interesit që me çdo formë e mjet po reagojnë kundër kësaj qeverisje krimanle që u ka humbur shpresën shqiptarëve dhe i ka shtyrë të emigrojnë.
Protestat nuk flasin thjesht për konflikt politik por për keqqeverisjen, kriminalitetin në rritje, papunësinë, shkatërrimin e bujqësisë, vjedhjen e pronës publike, përvetësimin e pronës private, sistemin e deformuar arsimor, korrupsionin e thellë e kështu me rradhë. Qytetarët protestojnë për shtëpitë e tyre, për taksat e rritura që falimentojnë bizneset, për shkollat pa kushte, për tarifat e universitetit, për produktet bujqësore që po u kalben, për spitalet me ilaçe të skaduara, për Shqipërinë që nuk krijon më asnjë mundësi veçse largimit”, tha ajo.
