Ministri i Brendshëm, Sandër Lleshaj, i ftuar në “Report Tv”, lëshoi një deklaratë bombë duke deklaruar se, ende nuk dihet se kush e ka vrarë Admir Muratajn, të akuzuarin si kokë e grupit të grabitjeve në aeroportin e Rinasit.
Deklarata e ministrit të brendshëm e bën edhe më të mistershme ngjarjen e 9 prillit, ku brenda pistës së aeroportit u grabitën rreth 10 milionë euro, pasi Policia e Shtetit ka pretenduar se Murataj u vra në shkëmbim zjarri me FNSH-në.
Sipas Lleshit, gjithçka është në dorë të hetuesve dhe ai si Ministër nuk dispononte të dhëna konkrete.
“Media mund të fantazojë, ose ajo ka akses në grupin hetimor, por këtë të fundit nuk e besoj pasi kam besim ata që po merren me hetimet. As nuk i mohoj, as nuk i pohoj emrat që kanë dalë në media. Kush e ka vrarë Admir Muratajn? Haxhi Mileti (Sali Berisha) thotë e kanë vrarë shokët e tij… Unë nuk e di se kush e ka vrarë. Pra nuk i kam unë në dorë faktet. Por nëse bëjmë analizë them se s’kishte arsye ta vrisnin shokët. Nuk e di kush e ka vrarë. Vrasja është e panjohur për sa kohë nuk është mbyllur hetimi. Dua të them se kam parë edhe diskutim malinj për të gjetur emrin e policit. Kjo nuk është korrekte”, është shprehur Sandër Lleshi.
Gjithashtu Lleshaj bëri deklarimin e “habitshëm” sa i përket sasisë së parave të grabitura. Ai tha se nuk mund të parashikojë ç’mund të jetë bërë më to, duke shtuar se mund edhe të jenë djegur.
Lleshaj u justifikua për mos-dheniën e asnjë informacioni për ngjarjeën nga ana e autoriteteve kur u shpreh se “policia hezitoi të bënte publike edhe faktet më ordinere, pasi sipas tij, çdo fakt që jepet në publik është një paralajmërim për dikë tjetër që është në kërkim”.
Ka qenë sulm i sinkronizuar në nivelin e sekondave, në kohë shumë të shkurtër, pak a shumë 5 minuta ka zgjatur grabitja, dhe 5 minuta ka zgjatur edhe arratia derisa grabitësit janë strukur në një tunel, ndërkohë që diku tjetër për të larguar vëmendjen e policisë i është vënë flaka diku më tej një furgoni të ngjashëm me grabitjen“, tha Lleshaj.
