Më 9 prill në pistën e aeroportit Nënë Tereza nga persona të armatosur dhe të maskuar u grabitën miliona euro, të cilat po imbarkoheshin në një avion pasagjerësh me destinacion Vjenën.
Paratë e grabitur u përkisnin 3 bankave të nivelit të dytë, Raifessen, Tirana Bank dhe OTP (ish-Societe Generale).
Ndërkohë ende nuk ka një shifër zyrtare mbi sasinë e parave të grabitura. Fillimisht u fol për 2 milionë euro, më pas për 10 milionë dhe në fund për 7 milionë.
Prokuroria e Krimeve të Rënda u ka kërkuar të 3 bankave informacione mbi sasinë e parave të grabitura. I njëjti informacion i është kërkuar edhe shoqërive të transportit që kanë transportuar paratë nga bankat drejt Rinasit.
Burime nga Krimet e Rënda shprehen se gjithashtu do të merren në pyetje personat përgjegjës të secilës prej bankave lidhur me zbatimin e procedurave në transportin e parave, por edhe të kompanive të transportit.
Gjithashtu po hetohet është rrjedhja e informacioneve, pasi grabitësit kanë qenë të saktë për orën se kur do të bëhej transporti, por kanë pasur dijeni edhe për sasinë e madhe të parave që do të transportoheshin.
Grabitja në pistën e aeroportit Nënë Tereza ka zgjatur më pak se 5 minuta, ndërsa në furgonin që hyri në pistë ishin 4 persona. Pasi morën pjesën më të madhe të thasëve me para grabitësit janë larguar mes përmes pistës për të dalë nga një tjetër anë e aeroportit. Këtu ka nisur ndjekja e tyre nga FNSH, e cila patrullonte në zonën pranë. Mes policëve special, që raportohet se kanë qenë 8, dhe grabitësve ka pasur shkëmbim zjarri, ku si rezultat mbeti i vrarë njëri prej tyre, i identifikuar si Admir Murataj.
Ky i fundit është identifikuar nga familjarë të tij në morgun e Tiranës, ndërsa është goditur në pjesën e kokës me plumb. Ndërkohë nuk dihet nëse Murataj është qëlluar nga policia, apo personat e tjerë që ishin pjesëmarrës në grabitje.
Krimet e Rënda kanë sekuestruar 10 gëzhoja, një aparat cellular që e kanë gjetur në një nga furgonët e braktisur dhe fjegur, një automatik tip kallashnikov që mendohet se është përdorur nga viktima, si dhe ka fiksuar disa gjurmë në automjetin që mendohet se është përdorur nga grabitësit gjatë largimit. /BN/
