Në prag të sezonit turistik, vetëm në njërin prej portaleve më të mëdha të dhënies së pronave me qira, Booking.com, numërohen rreth 2122 apartamente të regjistruara për tu dhënë me qira nga Shqipëria. Pjesa më e madhe e apartamenteve të regjistruara janë në zonat turistike.
Sipas faqes, në kryeqytet ka 240 apartamente të regjistruara, në Sarandë 717, në Durrës 242 dhe në Ksamil 212, pjesa tjetër janë të shpërndara në qytetet e tjera të vendit.
Portalet si Booking.com apo Airbnb janë bërë mjaft popullore në vitet e fundit në të gjithë botën duke shërbyes si ndërmjetës mes pronarëve të shtëpive dhe turistëve. Përveç hoteleve, pjesë e këtyre portaleve janë edhe individë të cilët regjistrojnë pronat e tyre për t’i dhënë me qira ditore.
Shpesh, midis kompanive që ofrojnë këtë lloj shërbimi dhe autoriteteve lokale ka pasur një konflikt të vazhdueshëm mbi taksat që duhet të paguhen në shtet për të ardhurat e gjeneruara nga qiratë.
Edhe Administrata Tatimore në Shqipëri në mënyrë të vazhdueshme e kanë ngritur si problematikë pagesën e detyrimeve prej qytetarëve apo bizneseve që përdorin këto platforma.
Drejtoria e Përgjithshme e Tatimeve ka sqaruar se të ardhurat e realizuara nga ofrimi i shërbimeve në strukturat akomoduese nga individët apo tatimpaguesit e regjistruar në administratën tatimore nëpërmjet përdorimit të faqeve të rrjetit internet si Booking.com, Airbnb e të tjera të ngjashme, janë të tatueshme, ndërkohë që personat që ushtrojnë këtë aktivitet janë të detyruar të jenë të siguruar për efekt të Kontributeve të Sigurimeve Shoqërore dhe Shëndetësore.
Një vit më parë, individët apo subjektet që linin prona ishin në fokus të Hetimit Tatimor që patën si qendër të inspektimeve vendet turistike. Megjithatë është pothuajse e pamundur që të identifikojnë individët apo bizneset që gjenerojnë të ardhura nëpërmjet tyre.
Tatimet kanë sqaruar më pare se informacioni i reklamuar në faqet e mësipërme të internetit, është në monitorim nga administrata tatimore, me qëllim identifikimin e atyre individëve, të cilët ushtrojnë këtë aktivitet pa qenë të regjistruar sipas dispozitave të Ligjit Nr. 9920, datë 19.05.2008 “Për Procedurat Tatimore në Republikën e Shqipërisë”, i ndryshuar.
Por, burime nga Tatimet thonë se një alternativë është merret informacion në rrugë zyrtare për të ardhurat që përfitojnë individët në Shqipëri duke përdorur këto platforma.
Booking.com: Vetëdeklaroni taksat në autoritetet lokale
Megjithatë, Booking.com ka shpjeguar përdoruesit e platformës se ato shërbejnë vetëm si agjenci ndërmjetësimi dhe se të gjitha rezervimet konsiderohen si një transaksion direkt midis pronarit dhe përdoruesit të pronës. Si rezultat i bëjnë thirrje përdoruesve që të njihen me taksat lokale apo legjislacionin në fuqi të aplikuar në këto transaksione. Ata këshillojnë që përdoruesit të konsultohen me kontabilistin apo qeveritë lokale për t’u përditësuar mbi taksat.
/Monitor.al/
