Stafit të Spitalit Rajonal të Korçës, i janë bashkuar 11 mjekë të rinj të specialiteteve të ndryshme duke plotësuar një pjesë të mirë të mungesave të deritanishme për mjekë specialistë.
Drejtori Ardit Konomi thotë se do të ketë edhe një fluks tjetër të mjekëve nga fundi i këtij viti, ndërkohë që sipas tij të gjithë mjekët e rinj kanë filluar tashmë nga puna pasi kanë lidhur edhe kontratat përkatëse me institucionin.
Një pjesë e mjekëve të rinj janë nga qarku i Korçës, por ka edhe të tjerë mjekë të cilët vijnë nga Tirana apo nga qytete të tjera të vendit për të punuar për një periudhë të pacaktuar pranë spitalit rajonal të Korçës.
Duket se ky vendim ka lidhje me vdekjen e një pacienti në urgjencën e Korçës.
Stela Tiko, nga Korça, u ankua për vdekjen e babait të saj, Sotiraqit, 67-vjeç, në datën 1 prill në Spitalin Rajonal të Korçës. Qytetarja në denoncimin e saj tha se nga data 31 mars e deri mëngjesin e datës 1 prill, ka kontaktuar disa herë me Urgjencën Kombëtare dhe me mjekët e Urgjencës së Korçës. Madje, ekipi i urgjencës i shkoi dy herë në shtëpi, ku i bëri disa qetësues dhe i rekomandoi të pinte ujë dhe lëngje. Qytetarja thotë se mjekja i ka bërë një qetësues voltaren, kur në fakt, sipas saj, babai i saj vuante nga aritmia. Qytetarja thotë se injektimi i këtij qetësuesi i ka shkaktuar problemet, që më pas i morën jetën.
