Ambasadori italian në Tiranë, Alberto Cutillo, i ka drejtuar një thirrje qeverisë që të dialogojë me opozitën, pasi nuk mund të realizojë reformat pa folur më parë me gjysmën e elektoratit apo deputetët që i përfaqësojnë ato.
Në një intervistë për Report Tv, diplomati Italian theksoi se maxhoranca nuk mund të hiqet sikur nuk ka ndodhur asgjë dhe se duhet të vazhdojnë urgjentisht të dialogojë me opozitën që ka dalë në rrugë.
“Unë u bëra thirrje të dyja palëve. Së pari opozitës, në lidhje me protestat që, nëse do të vazhdojnë, do të duhet të ruajnë formë paqësore dhe kjo më duket një vijë e kuqe shumë e qartë.
Unë kam thënë se shumica ndoshta ka më shumë përgjegjësi, por do të thosha edhe më shumë interes që situata në vend të mbetet e qetë, e veçanërisht që të rifillojë dialogu politik që për fat të keq gjatë gjithë kësaj legjislature ka qenë i munguar, pikërisht sepse vendi duhet të përballet me disa afate dhe reforma shumë të rëndësishme, reforma që nuk mund të miratohen nëse mungon plotësisht dialogu me pothuajse gjysmën e elektoratit dhe deputetët që e përfaqësojnë.
Kështu që unë besoj se nëse qeveria dëshiron të vazhdojë me këtë përpjekje reformuese që ne e mbështesim, ka nevojë të dialogojë me opozitën”, tha Cutillo.
