Ministrja e Energjisë, Belinda Balluku ka preferuar të përdorë toponimin sllav për qytetin e Manastirit në Maqedoninë e Veriut. Gjatë inspektimit të nënstacionit të HEC Koman, Balluku deklaroi se projekti i radhës “është linja 400 kV Elbasan – Bitola (Maqedoni).”
Manastiri është një qytet i rëndësisë së veçantë për historinë e shqiptarëve, pasi aty, më 1908, u zhvillua Kongresi i Alfabetit, ku u unifikua alfabeti i gjuhës shqipe.
Emërtimi Bitola është përdorur edhe në faqen zyrtare të Ministrisë së Energjisë së Shqipërisë.
Gafë të njëjtë bëri edhe ish-ministri i Jashtëm, Ditmir Bushati, në vitin 2013-të, kur sapo kishte marrë detyrën. Për të njëjtën temë, atë të interkonjeksionit, Bushati iu referua Manastirit me emrin Bitola. Reagimet e shumta në Shqipëri, por kryesisht nga shqiptarët në Maqedoninë e Veriut, detyruan në atë kohë Ministrinë e Jashtme që të korrigjonte gabimin.
Por përveç emërtimit të gabuar për Manastirin, Balluku ka bërë një tjetër ‘gafë diplomatike’ kur i referohet shtetit fqinj si thjesht Maqedonia dhe jo Maqedonia e Veriut.
I njëjti gabim nuk është përsëritur nga ambasadorja e Gjermanisë që shoqëronte Ballukun, e cila ka përdorur emërimin e saktë për Republikën e Maqedonisë së Veriut.
“Sektori i energjisë përbën prej atëherë një qendër të bashkëpunimit tonë dhe qeveria ka vënë deri më tani në dispozicion një shumë prej rreth 370 milionë eurosh vetëm për investimet në sektorin e energjisë. Mes tyre edhe për sistemin e transmetimit të energjisë elektrike 400 kV në drejtim të Malit të Zi, Maqedonisë së Veriut dhe Kosovës”, është shprehur ambasadorja Schutz. /Politiko/
