Me qindra mijëra qytetarë shqiptarë i janë bashkuar protestës së opozitës mbrëmjen e sotme para kryeministrisë. Në fjalimin e tij para qytetarëve, kreu i PD, Lulzim Basha tha se opozita nuk proteston për interesa politike, por për ti kthyer dinjitetin Shqipërisë.
Ai tha se nuk ka më pazare në kurriz të shqiptarëve.
“Kjo protestë është prova më e qartë se Shqipëria në këto 8 javë ka ndryshuar një herë e përgjithmonë, banda e Edi Ramës, oligarkët e pushtetit duan tu bëjnë të besoni se kjo nuk është një betejë e vërtetë ,se kjo nuk është një betejë për ju, por thjeshtë dhe vetëm një përplasja politike që do të zgjidhet në pazarin e radhës. Sot dua ta deklaroj unë në emër të PD, LSI, PDIU, PRI, LXZHK, PAA, PDK, PBDNJ të gjitha partive tona të koalicionit tonë, Rama ik, Rama Ik. Ne jemi në këtë betejë për ju qytetarët e këtij vendi, pavarësisht bindjeve politike, tu garantojmë se taksat tuaja, shtëpitë tuaja mos prishen për të përfituar oligarkët. Ne jemi këtu jo për të larguar Ramën, pasi ai tashmë është një kufomë politike, ne jemi bashkë për të varrosur Perandorinë Rama dhe për të themeluar standardet dhe të drejtat Europiane. Kushti i patjetërsueshëm është qeveria tranzitore, pa Edi Ramën”, deklaroi Basha. /bn/
