Nga Boldnews.al
Emrin e Admir Muratajt, si personi i vrarë në grabitjen e Rinasit të parët e nxorrën mediat greke. Në Tiranën zyrtare, informacioni mbahej i mbyllur, urdhri ishte që të mos jepej asgjë nga hetimi dhe nuk duheshin marrë me mediat “kazan” të vendit.
Por ndërsa ende nuk ka asnjë person të arrestuar për grabitjen, informacione krejt të ndryshme qarkullojnë në mediat prestigjiozë ndërkombëtare. Ka qenë gjigandi mediatik CNN, duke iu referuar agjencisë (AFP), në një raport të shkurtër për ngjarjen në Rinas, thekson se janë marrë në pyetje 40 persona dhe katër prej autorëve të dyshuar janë arrestuar.
Prokuroria por edhe policia shqiptare nuk e konfirmojnë këtë informacion, por diku ka rrjedhur ky “lajm konfidencial” dhe dyshohet se ai vjen nga zyrtarë të ministrisë, që me ose pa urdhër, tentojnë që të përmirësojnë imazhin nga krimi i 9 prillit.
Të gjithë mediat e rëndësishme ndërkombëtare i kanë bërë jehonë grabitjes së 10 milionë eurove në Rinas, nga katër persona të armatosur, të cilët i kishin të gjitha mundësitë të rrëmbenin edhe avionin me 104 pasagjerë, por fatmirësisht nuk shkuan deri në atë nismë.
Imazhi i Shqipërisë në sytë e botës po përshkruhet si një vend i mbytur nga korrupsioni, lidhjet e politikës me krimin e organizuar, trafikun e madh të drogës dhe së fundmi edhe mungesës së theksuar të sigurisë.
Për të “pikturuar” një Shqipëri imagjinare në normalitet, sipas shijeve kryeministrore, nga zyrtarë të lartë po qarkullojnë informacione diszinformuese për mediat ndërkombëtare, për të tentuar rregullimin e imazhit, që gjithsesi nuk mund të bojatiset nga zyrat e propagandës qeveritare.
