Fadromat e IKMT shembën dje disa nga banesat në zonën e Bregut të Lumit në Tiranë, ndërsa më parë policia ndërhyri dhunshëm duke përdorur forcën dhe gazin lotsjellës për të larguar pronarët nga shtëpitë e tyre.
Si pasojë e dhunës, të paktën 6 persona përfunduan në spital, dy prej të cilëve në gjendje të rënduar. Një burrë mbi 70 vjeç kishte marrë një goditje të fortë në kokë, ndërsa një grua kishte pësuar fraktura në këmbë.
E ndërsa bashkia e Veliajt me ndihmën e policisë së Lleshit trimfuan mbi disa qytetarë që tentuan të mbrojnë banesat e tyre, askush nga institucionet e shtetit nuk u kujdes se ku do të qëndronin të pastrehët e rinj të Lali Erit.
Një banore është shprehur se s’ka marrë asnjë ndihmë, ndërsa ka kaluar natën në gërmadhat e shtëpisë së rrafshuar.
“Kanë ardhur me mijëra herë këtu. Unë jam pa bukë, pa punë, ku do ha bukë unë tani?
Na thoshte dje ‘nëna ime’, ‘motra ime’, ku i ka këta.
Ne s’kemi bukë për të ngrënë tani. Nuk kemi bërë as drogë as krime dhe nuk kemi parë njëherë derën e policisë, dhe jo të hiqem zvarrë aty. Më ka rënë të fiktë. Asnjë fëmijë nuk kam këtu, kam 4 goca por i kam jashtë shtetit. Ne nuk jemi kriminela.
Mbrëmë këtu fjeta, mbi gërmadha, nuk e di ku më shkuan as mobiljet. Unë nuk i di se ku i kam rrobat, sot kam veshur rrobat e komshive. Sonte këtu do fle, ku të gjejmë vend.
Na lanë vetëm dy ditë kohë dhe na erdhën. Kemi frikë”, shprehet ajo.
