Nga Boldnews.al
Ka një rastësi të çuditshme në vjedhjet spektakolare të bankave apo furgonëve të transportimit të parave në këto vitet e fundit. Në të gjitha raste, ato kanë ndodhur në një periudhë kohore shumë pranë proceseve zgjedhore në Shqipëri.
Grabitja e parë ndodhi në 14 Shkurt 2015, rreth 3 muaj para zgjedhjeve lokale në Shqipëri. Disa persona të armatosur vodhën disa thasë me para në momentin që ato po dilnin nga ana e pasme e filialit të Union Bank, në zonën e “ish-Trenit” në Tiranë, për t’u transportuar drejt aeroportit të Rinasit.
Grabitësit neutralizuan punonjësit e kompanisë private të Sigurisë, “Euro-Gjici”, me pronar Safet Gjicin, i cili kandidonte në zgjedhjet e atij viti për kryebashkiak të Kamzës, nën siglën e Partisë Socialiste. Autorët arritën të vidhnin rreth 300 mijë euro.
Në 30 Qershor 2016, rreth 1 vit para zgjedhjeve të përgjithshme, një grabitje spektakolare ndodh në Aeroportin e Rinasit. Disa persona të armatosur hyjnë në pistën e avionëve dhe grabisin furgonët e kompanisë “Nazeri Security”. Shuma e vjedhur ishte rreth 3.3 milionë euro
Në 9 Shkurt 2017, vetëm 3 muaj para zgjedhjeve të përgjithshme, realizohet një grabitje, gjithashtu spektakolare në Qafë-Kashar, kur disa persona të armatosur arritën të merrnin rreth 3.2 milionë euro, pasi u bllokuan rrugën për në pistën e avionëve blindave të “Jaguar Security”.
Më 9 Prill 2019, vetëm 2 muaj para zgjedhjeve lokale të Qershorit, disa persona të armatosur hyjnë sërish në pistën e aeroportit të Rinasit dhe arrijnë të vjedhin rreth 10 milionë euro, sipas të dhënave paraprake.
Pas 4 grabitjeve spektakolare, policia ka arritur të rikuperojë vetëm një pjesë të vogël të parave. Për këto grabitje janë dënuar fillimisht punonjësit e kompanive private, të akuzuar për “shpërdorim detyre”.
Vetëm pak javë më parë, gjykata e Krimeve të Rënda dënoi edhe 8 persona, të akuzuar se janë të përfshirë në 3 rastet e para.
