Një person është vrarë gjatë një grabitjeje të ndodhur pasditen e sotme në zonën e Rinasit në periferi të kryeqytetit. Burime policore thane se viktima është një nga grabitësit dhe ka ndërruar jetë gjatë shkëmbimit të zjarrit me policinë.
Ngjarja
Burime thanë se grabitja ka ndodhur ne Rinas. Nga informacionet paraprake, mësohet se autorët ishin me një fugon të bardhe pa targa dhe me mbishkrimin “Hetimit Tatimor”. Gjithashtu ishin të veshur me rroba ushtarake.
Burime thanë se ka pasur të shtëna me armë gjatë grabitjes. Si pasojë, një person ka humbur jetën. Viktima, i cili mbeti i vdekur gjatë shkëmbimit të zjarrit me policinë, është një nga grabitësit, tha një burim policor.
Dyshimet paraprake janë se janë grabitur rreth 10 milionë euro, që i përkisnin 4 bankave të nivelit të dytë (një prej tyre Raiffeisen Bank) dhe do të transportoheshin jashtë shtetit. Autorët dyshohet se janë ndihmuar edhe nga dy automjete të tjera për të kryer grabitjen.
Jo larg vendit ku ndodhi grabitja, është gjetur një makinë e djegur. Makina e gjetur në vendin e quajtur “Ura e Bratit” dyshohet se iu përket autorëve.
Pas ngjarjes, është krijuar edhe grupi hetimor i udhëhequr nga prokurorët e Krimeve të Rënda, Ndini Tavani dhe Kreshnik Ajazi. Policia ka ngritur postblloqe të shumta dhe po punon për identifikimin dhe kapjen e autorëve.
Nuk është hera e parë që në Rinas ndodhin të tilla grabitje. Vitet e fundit, në Rinas kanë ndodhur dy grabitjeve të vlerave të mëdha monetare. /BN/
