Avokati Ledio Braho vlerëson se Policia dhe Prokuroria po veprojnë me arrestime kundër protestuesve, për të penguar ata t’i bashkohen tubimeve periodike që po zhvillohen së fundmi nga opozita shqiptare.
Në një intervistë në studion e “Fax News” paraditen e së Martës, avokati Braho komentoi rastin fatkeq të Gjergj Elezit, nga fshati Rrëmenj i Pogradecit.
Elezi është aktualisht nën masë sigurimi “arrest në shtëpi” për shkak se dyshohet për “prishje të qetësisë publike” dhe “kundërshtim të forcave të rendit” në protestën e 16 Shkurtit në Tiranë.
Protestuesi Elezi është përgjegjës për dy fëmijë të mitur dhe babain e tij të sëmurë. Në shtëpinë e tij mund të punojë vetëm ai. Por, pas arrestimit prej Policisë dhe kërkesës së Prokurorisë së Pogradecit, gjykata vendosi ndaj tij “arrest në shtëpi”. Në këtë mënyrë, institucionet ligjzbatuese e pengojnë atë që të dalë nga shtëpia, të punojë e të sigurojë të ardhura për fëmijët e tij të mitur.
Duke komentuar këtë rast, avokati Ledio Braho u shpreh se masa është ekstreme dhe nuk përligj kushtet e aplikimit të saj. Sipas avokatit, masat e sigurimit vendosen kur personi i dyshuar për kryerjen e një vepre penale mund të arratiset, mund të prishë provat apo mund të kryejë një vepër më të rëndë penale.
Për juristin, rasti i Gjergj Elezit nuk përligj asnjë prej këtyre kritereve për aplikimin e masës së sigurimit. Por, siç u shpreh ai, “masa të tilla po aplikohen nga Policia e Prokuroria për të penguar pjesëmarrjen e protestuesve në tubimet e opozitës, e cila është një e drejtë themelore e njeriut, e njohur nga Kushtetuta dhe Konventa Europiane e të Drejtave të Njeriut”.
Avokati Braho komentoi, në aspektin ligjor, edhe përplasjet e orëve të fundit të banorëve të Bregut të Lumit në Tiranë me punonjësit e policisë, të cilët janë në mbështetje të fadromave të Inspektoratit Ndërtimor.
Rreth 38 banesa, në proces legalizimi, po shkatërrohen për “interes publik”, pasi, në bazë të planit rregullues të Bashkisë së Tiranës, në atë zonë do të kalojë zgjatimi i Bulevardit të Ri.
Autoritetet publikë nuk kanë pranuar shpronësimin e këtyre banesave, duke argumentuar se ndërtimet janë pa leje. Për avokatin Braho, sjellja e autoriteteve shtetërore është e paligjshme. Sipas tij, administrata duhet të shpronësojë banorët, të cilëve po u prishen shtëpitë.
Godinat e protestuesve të Bregut të Lumit janë në proces legalizimi. Por, Bashkia ka vendosur t’i shkatërrojë pa asnjë mundësi dëmshpërblimi, për shkak se ALUIZNI nuk ka përfunduar procedurat.
Avokati Braho thotë që kjo është e patolerueshme. Sipas tij, banorët nuk mund të humbasin të drejtën e dëmshpërblimit, për shkak të vonesave të ALUIZNI-t në procedurat e legalizimit.
Sipas avokatit, autoritetet shtetërore po cënojnë parimin e sigurisë juridike, e cila është një e drejtën kushtetuese. Për Ledio Brahon, Qeveria dhe Bashkia nuk mund të ndërhyjnë, përsa kohë banesat e banorëve janë në proces legalizimi, nëpërmjet një ligji të miratuar dhe zbatuar po nga vetë institucionet shtetërore.
Ose, nëse ndërhyjnë, duhet t’u njohin këtyre banorëve të drejtën e shpronësimit të banesave për interes publik, përfundoi avokati Ledio Braho./BN/
